ZPM Thalai ten Chief Minister thusawi huat tur awma an hriat loh thu an sawi

ZPM Thalaite chuan Memorandum of Settlement 1986 chungchanga Chief Minister Lalduhoma thu sawi chu MNF tan huat tur a awma an hriat loh thu sawiin, Congress Thalai ten Chief Minister Lalduhoma poster duk dak lo taka an cheibawl chu an duh loh thu an sawi bawk.

Nimin-a thuchhuah an siamah ZPM Thalaite chuan July 31, 2026-a Chief Minister Lalduhoma’n Mizoram Law College Freshers Social & Felicitation Programme a hmanpuina-a Inner Line Permit leh Memorandum of Settlement 1986 chungchangah Opposition party-te anglo takin zep nei lo leh tlang takin thu a sawi thu leh ILP chungchanga Mizoram-in a tih theih chin leh a dinngheh theih chinte tlang taka sawiin, ILP chu hmansual theih a nih thu leh hmansual a nih in Mizoram Sawrkar chu Court a khin a niha a chak loh chuan chuan ILP hi paihsak theih kan nih thu te a sawi thu an sawi a. “Adaptation of Laws Order 1950 hmanga kan chhawm Inner Line Regulation hi Mizoram tana inhumhimna a nih rualin, hman sual theihna laka inveng tura Law Zirlaite a fuihna thuah hian ‘dawihzepna’ kan hmu ve lo a, thangthar ten thil nihna diktak leh tan lak kan ngaihna lai dik taka kawhhmuhtu Chief Minister Pu Lalduhoma hi kan ringtawk hle a ni,” an ti.

ZPM Thalaite chuan hun rei tak chhung MNF leh MPCC ten Mizoram min lo kaihhruai tawhna ah thudik chanve leh an tawngkam thiamna hmangin Mizoram mipuite kan dinhmun dik tak inhriat thelh tirna nen minlo awmtlei tawh thin niin an sawi bawk a. August 4, 2026 khan Congress Party chuan Chief Minister Lalduhoma chu thudik a sawi avangin poster hnaisai lo tak an siam sak thu leh mipui hmuh theih tura khawlai ah an tarchhuak hial tih sawiin. “Hetianga inbeihna tenawm tak, Kristian-te tih atana mawi lo khawp laka Congress Party-te an inveng zo thin lo hian ram hruai tlak an nih loh zia a ti lang chiangin kan hria,” an ti a. Hemi chungchanga MNF ten Total Bandh an sawi ri pawh, thil nihna diktak hmachhawn ngam zawk turin MNF te chu an chah bawk a ni.