Sialkal Range Development Council thukhawm

Sialkal Range Development Council (SRDC) thutkhawm chu nimin khan an Chairman leh Lengteng Bialtu MLA leh Minister, F. Rodingliana hovin a Pisa-ah neih a ni.

He thutkhawm ah hian SRDC Chairman F. Rodingliana chuan Sialkal Range Development Council-in a huam chin tih zauh tuma hmalak mek a nih thu tarlangin, tuna khaw paruk (6) bakah hian a chhehvel khua engemaw zat SRDC hnuaiah hian rinluh tum a nih thu a sawi a, chhak lam tlangdung-a Burma ramri hnaiha awm khua te tih hmasawn kawngah Mizoram Sawrkar-in nasa takin ngaih-tuahna a seng mek a, chumi tur chuan SRDC area zauh mai bakah dan mumal tak hnuaia inrelbawlna a awm theihna turin sawrkar-in SRDC Manual leh inkaihhruaina dan te a ennawn mek a, heng hi tih puitlin a nih hunah chuan SRDC area a huam chin khua ten nasa takin hma an sawn ngei a beisei thu a sawi a. Kumthar lamah chuan SRDC Budget pawh tihpun a nih a beisei thu a tarlang bawk.

He thutkhawm ah hian kum 2026-27 chhunga Sialkal Range hnuaia khaw paruk - Mimbung, Hrianghmun, Kawlbem, Teikhang, Selam leh Vaikhawtlang khuaa hmasawnna hnathawh tur hrang hrangte leh SRDC area tih hmasawnna tur hrang hrangte sawiho a ni. SDRC-ah hian Lengteng Bialtu MLA chu Chairman niin nimin a thutkhawm ah hian Member dang Champhai North Bialtu MLA H. Ginzalala, SDO (Civil) Ngopa, Development Officer, SRDC leh Mimbung, Hrianghmun, Kawlbem, Teikhang, Selam leh Vaikhawtlang VCP theuh te an tel a ni.

Tarlan tawh angin Sialkal Range Development Council (SRDC) hi khaw paruk chauh huam ni lovin khaw 15 huam tura din tum mek a ni a, Hnam bik pual ni lovin helai Bial-a cheng eng hnam pawhin hma an sawn theihna turin ruahmanna kalpui a ni.