Serchhip District-a damdawi dawr khar dawn; Sawrkar in mipuite chi-ai lo turin a chah

All India Organisation of Chemists & Druggists (AIOCD) ten lungawi loh lantir nana Vawiin a rampum-a Damdawi zawrhna dawr khar an tum chu Serchhip-a damdawi zuartute pawhin an zawm dawn a, sawrkar chuan mipuite chu chi-ai lo turin a chah a ni.
All India Organisation of Chemists & Druggists (AIOCD) hian Online Pharmacy dodal nan leh India rama e-pharmacy pawm a nih loh nan damdawi dawr zawng zawng kharin Vawiin, May 20, 2026 hian lungawi lohna an lantir dawn a, Mizoram-a damdawi zuartute pawhin hei hi an zawm dawn tih sawiin, Mizoram Chemist & Druggist Association Serchhip District President V. Laldinliana pawhin LENKAWL zawhna chhangin he hmalakna hi an zawm dawn tih a sawi a. Hei vang hian Vawiin hian Serchhip District chhunga damdawi zuar te pawhin an damdawi dawr an khar dawn tih sawiin, khawtlang mipuite hriatthiamna an ngen thu a sawi a ni.

Mizoram Chemists & Druggists Association chuan nimin khan Aizawl Press Club-ah thuthar thehdarhtute kawmin Dawr an kha chhan hi an sawifiah a. License nei veka damdawi zuar an nih thu sawiin, Thuneitu lamin strict deuha a vil thu leh Pharmacist-in a thutchilh lohte chu khar tura tih te an nih thu an sawi a, “Online-ah chuan license engmah an nei lova, lehkha lem siamte'n online-ah chuan a chah theih. Damdawi dang chah pahin, ruihhlo te pawh a chah theih,” an ti a. “Kan duh ber chu online hian dan zawm tur nei ve si tih a ni. Tunah chuan an tan dan a awm lova, a him lo. Kan duhamna leh hmasialna lam a ni lo a, India leh Mizoram mipui tan a ni,” tiin mipuite'n damdawi rintlak leh him ei se tih chu an duhdan a nih thu an sawi bawk.

Hetihlai hian Directorate of Health Services-a Food and Drugs Administration (FDA) Controlling & Licensing Authority chuan thuchhuah siamin Mizoram mipuite chu he dawr khar tur avang hian chi-ai lo turin a a chah a. Sawrkar leh Private Hospital Pharmacy-te hawn a nih dawn avangin heng ah te hian mamawh a lam theih reng dawn tih sawiin, Natna benvawn Zunthlum, Thisen sang, Asthma, Cancer leh a dangte nei chuan mahni damdawi mamawh lo inlam lawk tur a nih thu te; Emergency-a mamawh theih Insulin, Inhalers, Life-Saving Drugs leh naupang damdawi mamawh lo ngaihtuah lawk tur a nih thu te; ni khat chauh bandh a nih dawn avangin mamawh tawk bak a chuang aliamin eng damdawi mah lei khawl loh tur a nih thu te; Accident leh rikrum thil dang thleng a awmin Hospital hnai ber biakpawh thuai tur a nih thu leh Damdawi zuarte pawh dawr kharin Bandh zawm mah se, emergency thila damdawi mamawh a awmin dawr hawnsak hram hram tura ngen leh beisei an nih thu te an sawi a ni.