NCORD Meeting in ruihhlo dona a hmalakna an thlirlet

Serchhip District NCORD Committee chu nimin khan an Chairman leh Bawrhsap Paul L. Khuma hova thukhawmin ruihhlo dona kawnga an hmalakna te thlirlet a ni.
Serchhip DC Meeting Hall-a NCORD thutkhawm ah hian NCORD thutkhawm hmasaa an thurel bawhzuina thlirho niin thutkhawm hmasa leh nimin-a thutkhawm inkara an hmalakna tarlan ah ruihhlo (Narcotics) kaihhnawhah Police Department-in Heroine gram 10.7 manin Excise & Narcotics Department chuan Heroine gram 13.15 an man a. Police Department leh Excise & Narcotics Department lamin School leh College hrang hrangah Drug Awareness Campaign an nei bawk.

He Meeting hian Serchhip District chhunga Drugs do dan tur ruahmanna, Three Years District Level Action Plan to Combat Drug Menace duanchhin (Draft) chu an sawiho a, he rua-hmanna hi kenkawh a nih hunah chuan Serchhip District-ah chak lehzualin ruihhlo donaah hmalak theih beisei a ni bawk. District Narco Coordination (NCORD) Committee thutkhawm hi thla tin neih thin a ni a. Police leh Excise Department te, Health Department hnuaia Food and Drug Administration te, Sub-Headquarters YMA hruaitute leh mi pawimawh dang te Member an ni.