Serchhip District-a Sawhthing leina man pek fel niin SCC tam zawk ten Sawhthing an hralh zo tawh
Mizoram sawrkar in kumin February 20 atanga Sawhthing a lei chungchangah Serchhip Bawrhsap leh District Agriculture Marketing Committee (DAMC) Chairman Paul L. Khuma chuan nimin khan Serchhip DC Meeting Hall-ah an hmalakna te thuthar thehdarhtute a hrilhfiah a, he hunah hian Bawrhsap chuan February ni 20, 2025 atangin loneitute Sawhthing chu SCC-ah phurh luh tan a nih thu leh Serchhip District-ah hian SCC 7 awmin a thawhkhatna ah hian SCC tin te hi kg. 1,05,000 zel allotment pek an nih thu a sawi a. Heng te hi SCC tin hian an huamchhunga Primary Collection Centre (PCC)-ah insem ve lehin PCC tin tan hian hralh tur zat bituk a awm thu a sawi a. Amaherawh chu ruahman lawk aia tam Sawhthing lo cho te an awm avangin Sawrkarin hriatthiamna thui tak neiin allotment pek zat pela Sawhthing lei sak engemawzat an awm thu a sawi a. Sawhthing leina man te hi kuthnathawktute hnenah Bank account-ah Direct Benifit Transfer hmanga pek vek an nih tawh thu a sawi bawk.
Bawrhsap chuan SCC ten Sawhthing an lei te hi anmahni SCC-ah theuh lilam lehin heng te hi sumdawng te hian chhangin hralhchhuah leh mek a nih thu a sawi a, a tirah North Vanlaiphai SCC-a Sawhthing lei te chu Sairang-a Buffer Stock-ah phurh niin a bak chu SCC atang hian hralhchhuah leh a ni tih a sawi a. Nimin thleng khan Lungpho leh Thenzawl SCC tih loh SCC dang zawnga Sawhthing lei te chu hralhchhuah leh vek a nih tawh thu sawiin, Sawhthing quintal 4851.4949 hralhchhuah a nih tawh thu a sawi a, hemi atang hian Rs. 98,33,950/- hmuh niin nimin lam khan Thenzawl SCC ami hi hralhchhuah leh tum a nih thu leh Lungpho SCC pawh inbiakna a kal mek thu te a sawi bawk a ni.
Serchhip Bawrhsap chuan 1st Phase-a Sawhthing an lei hralh zo leh Kudam ruak tawh SCC te hi 2nd Phase-ah an luh nghal dawn thu sawiin, Serchhip SCC chuan auction hmasa ber an tihchhuah tawh thu a sawi a, 2nd Phase atang hian SCC te chu anmahni ke-a ding tura beisei niin DAMC in auction pawh chhuah tawh lovin SCC ten an chhuah tawh anga, Sawhthing leitu (buyer) pawh anmahni in zawngin Marketing Team te pawhin an theih anga an puih dawn thu a sawi a ni.
Sawhthing lei kalpui zel dan tura rua-hmanna Bawrhsap chuan sawiin, SCC te hian Sawhthing hralhna tur auction an tihchhuah ah hian sawrkar chuan Reserved price siamin he rate mil hian SCC hian Sawhthing hi an lilam anga, sawrkar in rate a siam anga a hralhna hmu chuan hralh nghal theih a ni anga, an hralhna atanga kg. khat a Rs. 50/- a tlin lohna chu Support Price pek an nih tawh tur thu a sawi a. He rate hi ennawn zel theih tur a nih thu pawh a sawi bawk a ni.
Ruahmanna siam a nih danin Sawhthing hralh tura PCC atanga SCC-a phurh te hi buk lovin a neitu hming leh bag an dah zat mumal taka chhinchhiah a ni tawh anga, hei hi SCC atanga hralh a nih dawn ah buk tur a ni dawn thung a, mimal tana hralh theih zat bituk awm tawh lovin SCC in hralhna tur an hriat zat zat hralh theih a ni tawh anga, Sawhthing leitu (buyer) te hian Sawhthing man an pek fel hma chuan SCC atanga phurh-chhuah erawh phal a ni dawn lo a, SCC kaltlanga hralh te hnenah chauh hian Supprt Price hi pek tur a ni ang.
He hunah hian DAMC-a Member Secretary leh Serchhip DAO Lalchharliana chuan Sawhthing lei chungchang hi mipuite pawhin an hriatchian a pawimawh thu sawiin, hriatchian duh nei te chuan DAMC-ah zawh-fiah theih reng a nih thu a sawi bawk.
Comments
Post a Comment