A theih tawp chhuahin a Bial tan hna a thawk zel dawn tih Chief Minister in a sawi
Vantawng Group YMA Inkhawmpui vawi 26-na nimin a Tuirihiau Run, Buangpui-a neih a hmanpuina ah Serchhip Bialtu MLA leh Chief Minister hian a theihtawp chhuahin a Bial tan hna a thawk zel dawn tih sawiin, a Bial tana hma a lakna thenkhatte pawh a tarlang a; Thenzawl damdawi In-ah Ultrasound leh Serchhip damdawi In-ah Dialysis khawl dah thar a nih tur thu sawi a. Chief Minister Bial a nih vanga duhsakna ni chuang lovin, a tulna vang zawka Thenzawl-a PWD Division dah thar tura sawrkarin hma a lak thu leh Vantawng Khawhthla-a Rope Way siam thuai an tum thu a tarlang bawk. Hei bakah hian Muanna Khawpui (Peace City), mipui nuai sawm vel chenna tur Thenzawl leh a chhehvela dinna tur Prime Minister Narendra Modi hnena a dil chu an hmuh theih a rinawm chho zel tih sawiin, “16th Finance Commission-ah pawh ka lo sawi a. Tunah hian Ministry of Housing and Urban Affairs (MoHUA) chuan Master Plan siamna tur cheng vbc. sawm min rawn phalsak a ni. Hun erawh a la duh deuh ang,” a ti bawk.
Sawrkar chuan ram hmasawnna chu ngaipawimawh ber mah se mipuite chhungril nun (moral) a chhiat si chuan hmasawnna tluantling a ni theiin an hre lo tih pawh Chief Minister chuan sawiin, “Chuvang chuan mipui sukthlek siamna (moral reformation) keng tel hmalakna kan kalpui nual tawh a. Kan la kalpui zel dawn. Minister zingah eiruk ching an awm sawi tur a awm lova, a thlawna dawn beiseina thinlung pawh kan tireh chho mek a, sawrkar hnathawkte chu hun vawng dik tura beisei tlat an ni. Ruihhlo dona kawngah pawh kan tha kan thlah dawn lo,” a ti a. Kan thalaite nun tihchhiatsaka, naupang te tea an boral pawh pawi ti map lo, ruihhlo zuar te chu an ngai thei lo tih sawiin, “Kan en liam mai mai dawn lo. Tunhnaia Drugs tam tham tak mantu Sub-Inspector Zirthanga pawh kha Vawiin-ah ka bia a, a thawhpuite nen chawimawina kan hlan dawn a ni,” a ti bawk.
Chief Minister chuan Vantawng Group YMA te duhsakna chibai bukin, “Mipuite nun kawng siamthatna leh khawtlang nun venhimna kawnga kan thawhpui pawimawh ber chu YMA te hi in ni a, mawhphurhna sang tak in chelh tih lo hre reng ang che u,” tiin YMA te hi a chah a. Inkhawmpui hlim leh nuam tak hmang turin duhsakna a hlan bawk a ni.
Nimin-a Vantawng Group YMA Inkhawmpui hi chawhnu lamah Supply Minister B. Lalchhanzova chuan hmanpuiin Zaipawl leh Mizo Hnam Lam-a intihsiakna neih a ni bawk a, Vantawng Group YMA-ah hian YMA Branch 13 awmin, Member hi 7523 an awm a ni.
Comments
Post a Comment