Mipui ten RTI an hmang tangkai niin sawi

Sawkar laipui-a Central Chief Information Commissioner (CIC), Heeralal Samariya chuan mipuiten Right to Information Act an hmang tangkai tih sawiin, sawrkar khalh ngil tura mipuite hmanraw pawimawh tak a ni mek tih a sawi.

Central Chief Information Commissioner hian Mizoram rawn tlawh turin nimin khan Aizawl a rawn thleng a, nimin vek khan Mizoram Information Commission Pisa tlawhin, mipuiten RTI an hman tangkai chuan sawrkar hotuten thutlukna dik an siam theih phah thin tih a sawi a. State sawrkar tinin RTI hmangin mipuite zawhna an dawng thin tih sawiin, ni 30 chhunga chhan ngei ngei thin a nih thu leh sawrkar chhanna ah mi an lungawi lo a nih chuan zawh chhunzawm nan 1st Appeal leh 2nd Appeal thlenga a awm thu a sawi a. Sawrkar laipui-ah pawh kumtin RTI zawhna nuai 40 atanga nuai 50 an dawn thin thu sawiin, hei hian mipuiten tangkai tak leh phur takin an thil hriat duh te hre turin RTI an hmang tangkai tih a tihlan thu a sawi a ni. 

Chief Information Commissioner chuan RTI Act chuan engkim langtlanga a siam thu thu leh hei hian sawrkar tha a siam thei tih sawiin, mipuite khalh ngil theih leh mipuite duhdan ngai pawimawh sawrkar tha a siam thei dawn tih a sawi a. India ram pumah Hybrid Mode kalpui zel a nih tawh thu pawh sawiin, hemi awmzia chu Internet kaltlangin e-registration kalpui a ni a, File pawh Electronic File a vawn a ni vek tawh a, changkang leh awlsam taka kalpui zel tawh a ni, a ti. Chief Information Commissioner chuan Mizorama mipui, lehkha thiam tam lutuk te, Mizoram in ramngaw a nei tha em em mai te leh kawngpuia inkaihhruaina tha avanga lirthei horn hmeh rik tuarh tuarh awm ve lo chu nuam a tih thu leh a chenna nena khaikhinin vanram ang mai a nih thu a sawi bawk a ni.

Chief Information Commissioner hian nimin vek khan Reiek Tourist Resort a tlawh nghal a, ruahman lawk ang chuan Vawiin hian Serchhip a rawn tlawh dawn a, Serchhip-ah hian DC bakah DAA leh SPIO te a kawm anga, hemi hnu hian Thenzawl tlawhin Tuirihiau leh Vantawng Khawhthla te a tlawh leh hnuah tlai lam hian Aizawl a pan leh dawn a ni.