MTDA in kawng chhia siamthat an phut lai October 9 hmaa siamtha turin CM in a hriattir

Mizoram Truck Driver Association (MTDA) chuan Dur Lui leh Sairang inkar kawng NH-306 chhe lutuk chu hmalakna a awm loh chuan tlan loh thlenga hma lak an tum tih an sawi a, Chief Minister chuan helai kawng hi tun thla ni 9 hmaa siam turin a hriattir nghal.

MTDA hian thuchhuah siamin, Dur Lui leh Sairang inkar NH-306 kawngpui chu a chhiat avangin lirthei khalhtute leh an member-te atangin sawiselna an dawng tam tih an sawi a, helai kawng hi an enfiah hnuah kawng chu a chhe hle tih an finfiah a nih thu sawiin, lirthei lian rit phur tan kal reng ngamna chi-a an ngaih loh thu leh kawngpui chhia chu lirthei khalhtute tan nunna chan palh theih hial khawpa chhia a nih avangin sawrkar chu tun thla, October ni 9 ralhma ngeia kawngpui chhe zual siam turin an ngen a; hemi hun chhunga hmalakna leh kawng siam hmuh tur a awm loh chuan Mizoram Truck Driver-te rit phura an kal ngam lo a nih pawhin MTDA chuan mawh an phur dawn lo tih an sawi a ni.

Chief Minister Lalduhoma chuan Inrinni khan Sairang leh Kawnpui inkar kawng, NHIDCL ten an siam mek hi tlawhin, Kawngpui chhe zual te chu October ni 9 ralhma ngeia hnawh mam hman turin a hrilh a. Chief Minister chuan helai hmunah hian kawng chhia hi hmun 4/5 velah a awm tih sawiin, amaherawh chu siam har lutuk tur a ni loh thu leh hmanrua te lain an siam dawn mek tih a sawi a, tun thla ni 9 hmain siam ngai zawng zawng siam tura an in hrilh thu leh anmahni pawhin an peih hman tur thu an tiam tih a sawi bawk.

Chief Minister chuan kawng chu a then chu NHIDCL in khawhin a then chu Mizoram PWD in an khawih a nih thu sawiin, mipuite tan pawh tute enkawl zawk nge tih hriat a har thin thu a sawi a, tuna kawng chhia chu NHIDCL enkawl a nih thu leh Mizoram sawrkar mawhphurhna a ni chiah loh thu leh PWD pawhin tih tur a nei lem lo tih a sawi a. Hei vang hian NHIDCL hotute koin a hmunah an enfiah thu leh siamthat thuai an tiam thu a sawi bawk a. NHIDCL te chu a tul chuan Sub-Contractor te pawh lak belha an hna a tha lo a nih chuan ban-a a dang te pawh turin a hrilh bawk a ni.

Kawnpui leh Khamrang inkar kawng pawh Mizoram sawrkar mawhphurhna a ni hran lo tih Chief Minister chuan sawiin, Satguru te enkawl a nih thu leh an enkawl hun a tawp hnuah NHIDCL te enkawl zui tur a nih thu a sawi a, Amaherawh chu an enkawl hun chhung tur ala tawp lo chunga an enkawl theih loh thu leh NHIDCL in a la lak duh bawk si loh avangin State sawrkar chuan a mawhphurhna a ni chiah loh chungin mipuite harsatna hrethiamin State sawrkar sum-a siamthat mek a nih thu a sawi a. “Hei hian kan pawisa ruahman sa nasa takin a ti danglam a, kan sen lohna tura kan ngaih sen ngai kan ngah em em,” a ti a. Kawnpui leh Khamrang inkar-ah chuan sawisel tur vak a awm tawh loh thu leh PWD in ngawrh taka an siam mek thu a sawi a ni.