DP&AR Minister in All India Services-a Mizo inziak tling kan tlem zel veiawm a ti

Department of Personnel & Administrative Reforms (DP&AR) Minister K. Sapdanga chuan All India Services-ah Mizo inziaktling kan tlem zel chu veiawm a tih thu sawiin, State bil Cadre neih chu thil pawimawh tak nia a hriat thu te a sawi bawk.

Zoram Research Foundation, Mizoram IAS Association leh The Aijal Club-te tangkawp buatsaih, Mizoram tana All India Services Cadre hranpa chungchang zirhona nimin Oct. 4, 2024-a Aijal Club R.B. McCabe Hall-a neih a hmanpuina ah DP&AR Minister K. Sapdanga chuan Mizoram hmakhua ngaia mithiam tak takte'n Mizoram tana All India Services Cadre hranpa chungchang sawihona hun an buatsaih leh program hmanpui tura sawm a ni chu lawmawm a tih thu a sawi a. Tun dinhmunah Mizoram in All India Services (AIS) sanctioned post chu IAS 32, IPS 19 leh IFS 19 a neih mek thu leh Sawrkar laipuiin IAS leh IPS 6 ve ve a rawn dah thar thu a sawi a. All India Services-ah Mizo inziaktling kan tlem zel chu veiawm a tih thu sawiin, Mizoram inrelbawlna kawnga Sawrkar fawng pawimawh leh sang tak tak chelhtu tur Mizo kan nei meuh ta lo chu tanlak thar nana hman nise a duh thu a sawi bawk.

DP&AR Minister chuan State Sawrkar hnuaia a pumhluma All India Services-te an awm theih nan State bil Cadre neih chu thil pawimawh tak nia a hriat thu sawiin, Service hun pumpui State danga insawnkual reng lova hmun khata hman hian hnathawh kawngah rah tha a chhuah thei dawn tih a sawi a, Cadre review-te pawh ngaihtuah tel a pawimawh thu a sawi bawk.

Mizoram tana All India Services Cadre hranpa chungchang zirhona hunah hi Zoram Research Foundation General Secretary Rochamliana chuan kaihruaiin P.C. Lawmkunga, IAS (Retd.), President, Mizoram IAS Association chuan inlawmna thu a sawi a. Mizoram IAS Association atangin C. Ropianga, IAS (Retd.) chuan thupui a sawi hawn hnuah sawihona hun hman chhunzawm a ni a. He hunah hian Mizoram in All India Services Cadre hranpa a neih loh avanga inrelbawlna kawnga harsatna a tawh thinte, Cadre hranpa neih thatna leh that lohna nia langte tawnhriat nei tawh te'n chipchiar takin an sawi a. Mizoram puala All India Services Cadre hranpa neih a hun tawh takzet thu leh Cadre Review Committee ngaihpawimawh tel a tul thute tarlan a ni.

Mizoram hian All India Services (Indian Administrative Service, Indian Police Service & Indian Forest Service) Cadre hranpa a nei lova, AGMUT Cadre-ah a awm mek a. AGMUT Cadre hnuaiah hian Arunachal Pradesh, Goa, Mizoram leh Union Territory-te an awm a ni.