Champhai-ah SARAS Fair 2024

Mizoram State Rural Livelihood Missions (MzSRLM) buatsaih Sales of Rural Artisans Society Fair (SARAS) Fair 2024 chu nimin khan Rural Development Minister Prof. Lalnilawma chuan Hnahsin Kut hmanna, Aui Garden, Champhai Phai phei-ah a hawng.

RD Minister Prof. Lalnilawma chuan Hnahsin Kut ruala SARAS Fair 2024 buatsaih a ni chu lawmawm a tih thu a sawi a. SARAS Fair thil tum ber chu Self Help Group-te thil tharchhuah, hralhchhuah leh mipui hmaa pholanna remchan zawn a ni, a ti a. Aizawl khawpuiah chauh ni lo, Mizoram hmun dangah pawh hmasawnna leh thil thar thlen zel a duh thu sawiin, Champhai-a SARAS Fair neih anih theihna tura hmalatu sawrkar official te chungah lawmthu a sawi bawk.

SARAS Fair hi MzSRLM bultumin kum 2015 atang khan neih tan a ni a. Kumtin State Capital leh District Headquarters a neih thin tura ruahman a ni a, Covid hripui leng leh inthlanpui ten a khaihlak tum tih lohah chuan tluang taka neih thin a ni. SARAS Fair 2024 hi SARAS Fair vawi kua neihna a ni a, October ni 4 atanga ni 11 chhung neih tur a ni. He hunah hian Mizoram hmun hrang hranga Self Help Group ten Stall 44 ah an thil siam te an phochhuak a ni.

MzSRLM hi National Rural Livelihood Missions hnuaiah kum 2013 khan din a ni a. A tum ber chu thingtlanga cheng chhungkaw harsa zawkte Self Help Group (SHG) hmanga khai-chhuah leh retheihna an kalsan hma tanpui a ni. MzSRLM hian Mizoram District 11 leh RD Block 28 te a tuamchhuak vek tawh a, SHG hnuaiah hian chhungkaw 81,829 an inziaklut tawh a, SHG-te khaikhawm tur hian Village Organisation 791 leh Cluster Level Federation 84 din a ni tawh bawk. Mizoram puma SHG-te tan hian Community Fund cheng nuai 18449.99 pekchhuah tawh a ni a; SHG 5149 ten Bank Loan cheng nuai 15163.9 an la tawh a ni.