Lunglei District-ah Chikungunya kai hmuchhuak

Nimin khan Lunglei-ah Chikungunya natna laka inven dan tur leh hmalak dan tur District Bawrhsap Kulothungan A, IAS hovin ngaihtuah a ni.

Thosi tial seh atanga natna kai theih Chikungunya chungchanga hmalak dan tur ngaihtuahna ah hian Lunglei Bawrhsap chuan tunhnaiah Lunglei khawpui chhung Veng hrang hrang leh a chhehvel khaw thenkhat Sekhum leh Haulawng-ah te Chikungunya vei hmuhchhuah a nih thu a sawi a. He natna laka lo invendan leh hmalak dan tur ngaihtuah a ngaih thu sawiin, mipuite hnenah Chikungunya chungchang puanzar kawngah hmala turin Medical Department te a sawm a ni.

Medical mithiam ten Chikungunya hi Malaria pai Thosi ang nilo Thosi tial, chhun-a mi seh ching a nih thu an sawi a, Chikungunya natna hmuhchhuahte awmna Veng ah chuan Thosi chu awm tura ngaih a ni a, chutiang Thosi laka inven leh Thosi inthlahpun theihna hmun tihchhiat te chu invenna pawimawh a nih thu an sawi a. Chikungunya hi khawsik sang tak nei thut, taksa leh tihrawl na, chauh ngawih ngawihna, lu na, luakchhuak leh thak a langchhuak a ni. Kumin chhungin Lunglei khawpui leh a chhehvel khua ah mi 77 en zingah mi 22 chuan he natna hi an vei a ni.