Lenkawl

Consumer te i harh ang u -XXXVI : Aadhaar Card chungchanga i hriattur te - Laldinpuia, Secretary  Serchhip District Consumer Association

Serchhip-a District Horticulture Office chuan nimin khan Serchhip Zawlpui Phai-a Thlasik thlai chingtute tana intawhkhawmna leh Thlasik thlai chin dan zirhona an buatsaih a, Serchhip Mat Phai-ah hian thlai chi dang tam zawk tharchhuah a nih theih nan kumin hian thlai dang chin belh tum a ni.

Kum 2018 atanga India rama kalpui Pradhan Mantri Matru Vandana Yojana (PMMVY) hnuaia hman thin Matru Vandana Saptah chu kumin ah pawh hman leh turin nimin khan Serchhip-ah District Bawrhsap Nazuk Kumar IAS chuan a hawng.

Serchhip District-a Zirtirtu tha thlanchhuah mi pathum te hnenah nimin khan ‘District Award to Teacher’ hlan an ni.

Tunhnaiah Serchhip District-ah Dengue a leng nia sawi awm mah se Serchhip-a Health Department-a thawktute chuan kumin chhungin he hri kai hmuhchhuah hi Serchhip District-ah awm mang lo tih an sawi.

Kumin March 29-a Serchhip District-a ASF hri leng avanga Vawk thi a awm leh hnuah nimin thleng khan ASF vanga Vawk thi chu 295 an tling ta a, Vawk 384 suat a ni tawh bawk. Nimin khan Khawlailung khua ah Vawk thi pakhat awm belh lehin hmundang ah Vawk thi leh suat a awm lo thung a, Khawlailung khua hi Serchhip District-ah kumin a ASF vanga Vawk chan hnem ber ni mekin Vawk 19 a thih tawh bakah Vawk 166 suat a ni tawh bawk.

Serchhip District chhung Baktawng VC a hmeichhe tana Seat hauh hnawhkhahna tura by-election chu Vawiin hian neih a ni dawn a, inbuatsaihna peihfel a ni tawh. He inthlanna ah hian Congress, MNF leh ZPM ten Candidate siamin tukin dar 7:00 atang hian Vote thlak a ni anga, Vawiin tlai dar 5:00 thleng Vote hi thlakin zan dar 6:00-ah Vote chhiar a ni ang.

Nimin khan Serchhip-a zirna In hrang hrang te chuan Zirtirtute Ni chu urhsun takin an hmang a, khuallian te nei-a he ni hmang hi an awm bawk a, zirna In tam berah chuan zirlai ten an Zirtirtute hnenah he ni puala duhsakna thilpek chi hrang hrang hlanin hun an hmang a ni.

Serchhip District chhung khaw hrang hrang ah dan ang ni lova kuhva phur lirthei an kal thin tih hriat a ni a, Serchhip District chhunga dan phal loha kuhva phurh a lo rem theih nan Serchhip District Magistrate Nazuk Kumar IAS chuan Section 144 of Cr.PC 1973-in thuneihna a pek angin Serchhip District chhung khawi hmunah mah dan ang ni lova kuhva lakluh leh phurh phal a ni lo tih thupek a chhuah a, he thupek hian thu leh awm hma chu Order chhuah, September 2, 2022 atanga thla 2 (hnih) chhung a huam anga, thupek zawm lo chu Section 188 IPC dan hmangin hrem theih an ni ang.

Nimin khan Serchhip District-ah COVID-19 hri kai mi pakhat hmuh belh niin hri kai mi 2 te anmahni enkawlna atanga chhuahtir an ni thung.

PC Party President Lalhmangaiha Sailo chuan thalai zawk kutah Party kaihhruai hna dah tumin a nihna a chawlhsan dawn tih nimin-a an Party Elected OB thutkhawm a chenna In-a neih ah a puang a, an Party kaihhruai hna pawh Party Sr. Vice President Vanlalruata kutah a hlan tih a puang a ni. PC Party hian naktuk khian an kal zel dan turah thutkhawm an nei nghal dawn a ni.

Mizoram State Election Commission chuan Lunglei Municipal Council, 2022 inthlanna neih tur atan Lunglei District Bawrhsap chu District Municipal Election Officer & Appelate Authority atan a ruat.

Lawngtlai District Bawrhsap Amol Srivastava chuan nimin-a Zirtirtute ni pual khan Govt. Lawngtlai College tlawhin Principal leh Zirtirtute duhsakna chibai a buk a, zirtirtute pawimawhna tarlan nan leh zirtir hna a dah sanzia lantir nan 1st Semester zirlai hmaah ‘Emotional Intelligence and its importance in Life’ tih thupui hmangin Class a la bawk a ni. He hunah hian Subject hrang hrang zirlai mi 150 chuang an kalkhawm a, an Zirtirtute duhsakna chibai bukin, Zirtirtute zah turin an intiam a ni.

Mizoram State Election Commission in a lo ruahman tawh angin Mizoram-a Local Council leh Village Council-a Seat ruak hrang hrang ah Vawiin hian by-election neih a ni dawn hlawm a, he inthlanna a Vote tla te hi Vote thlak zawhfel veleh chhiar nghal tur a ni ang. Hetihlai hian Mizo-ram State Election Commission chuan nimin khan hriattirna tichhuakin Gauhati High Court, Aizawl Bench thupek angin Keifang Venglai Village Council By-Election Vawiin a neih tura ruahman lawk chu thulh rih a ni tih a tarlang thung.

Mizoram Legislative Assembly Favang thutkhawm chu Vawiin hian neih tan a ni dawn a, ni thum chhung thutkhawm hi neih tur a ni ang. Thutkhawm tan ni Vawiin hian chawhma dar 10:30-ah zawhna leh chhanna hun hman nghal a ni anga, darkar khat chhung zawhna leh chhanna hun hman a nih hnuah House-ah lehkha pawi-mawh te pharhin hemi hnu hian Taxation Minister Lalchamliana chuan House-ah ‘The Mizo-ram Goods and Services Tax (Amendment) Bill, 2022’ chu House-ah a pharh dawn bawk a ni.

Mizoram Board of School Education (MB-SE) chuan High School leh Higher Secondary School naupang registration thehluh theih hun chu September 9, 2022 thleng pawhsei a ni tih thuchhuah siama tarlangin, Pawl 9 leh Pawl 11 naupang registration hi MBSE online portal - mbseonline.com kaltlang in tih vek tawh tur a ni a. Pawl 9 leh Pawl 11 repeater, Registration number nei tawhte pawh a tharin online portal-ah in register leh vek tur a ni. Hei hi Online Portal hmanga registration number format thar hi exam form thehluhna atan kum 2024 atang chuan hman a nih tawh dawn vang a ni.

Nimin khan Lawngtlai District Level Committee on Myanmar Refugees chu an Chairman leh District Bawrhsap Amol Srivastava hovin an thukhawm a, he hunah hian kumin August ni 31 atanga Lawngtlai District dep ramri hnaih, Myanmar ramchhung Varang leh a chhehvela Myanmar Army leh Arakan Army te an inkah avanga Lawngtlai District chhunga Myanmar raltlan an lo luh belh thu tarlan niin an District chhunga heng raltlan lo lut te enkawlna kawnga hmalak dan te tarlana thlirho a ni.

Mizoram-ah nimin tlai thleng khan COVID-19 hri kai hmuh te atanga za zela 99.56 te chu enkawl dam an ni tawh.

Mizoram University-a Education Department chuan nimin-a Teachers’ Day hman tak pualin Seminar an buatsaih a, he hunah hian Mizoram-a Education lo thanchhoh dan te, Science leh Mathematics zirna lo thanchhoh dante sawiho a ni. He hun hi HRD Board Vice Chairman L. Thangmawia MLA chuan hmanpuiin Science leh Mathematics chu Zirtirtu kan neih that loh rei avangin kan rual u zawk ten subject har leh Mizote thiam theih lohah an ngai thin nia sawiin, mahse chu chu hun in her zel hian rawn ti danglamin tunah chuan India ram mai ni lo, khawvel huap pawha lang tham Science leh Mathematics-ah Zofate kan awm nual tawh a ni, a ti a. Mizo zirlaite thluak hian hnamdangte ang bawkin heng Subject thiam tur hian a tlin tih sawiin, Hnamdangte zir ang tluka zir tura tumruhna leh taihmakna kan neih hi a pawimawh ber zawk a ni, a ti. He Seminar hi Prof. H. Malsawmi, Head, Department of Education, Mizoram University chuan a kaihruai a ni.

Chhiahtlang Pastor Bial KTP te chuan Inrinni khan Serchhip Blood Bank-a dah turin thisen Unit 37 an pe a, thisen petute hi mipa 32 leh hmeichhia 5 niin heng mi tlawmngai te thisen la tur hian Serchhip atangin Blood Bank-a thawktute an kal a ni.