Serchhip District-a piang leh thite chhinchhiahna kalpui dan leh hmalak zel dan tur sawiho a ni
He thutkhawm Serchhip DC Meeting Hall-a neih hi an Chairman, District Bawrhsap leh District Registrar of Births & Deaths Paul L. Khuma chuan kaihruaiin Birth Certificate leh Death Certificate te chu chhinchhiahna pawimawh tak a nih bakah sawrkarin hmasawnna hna a thawhnaah pawh ruahmanna (plan) a siamna atana hmanraw pawimawh em em an nih avangin a pekchhuah kawngah fimkhur a tul thu a sawi a. Chhinchhiana bu (register) te pawh digitize thlap a pawimawh thu sawiin, hma la zui turin thawktute a chah bawk a. District Level Coordination Committee (DLCC) on Civil Registration System (CRS)-a Member Secretary, Serchhip District Research Officer (DRO) leh Additional District Registrar of Births & Deaths Lalthangmawia'n an hnathawh leh hmalakna hrang hrang te a tarlang a. Serchhip District-a piang leh thite chhinchhiahna kalpui dan thlirho niin, felfai leh tha zawka hmalak dan turte sawiho a ni.
He thutkhawmah hian piang leh thite chu an pian leh thih atamnga ni 21 ralhmaa CRS-a chhinchhiah fel leh thuneitute hnena report tur tih a nih angin Serchhip District chhunga sawrkar leh Private damdawi In te dinhmun thlirho niin, he inkaihhruaina hi tha taka an zawm zel theih nana hma ak dan turte sawiho a ni a. Birth Certificate leh Death Certificate diltute'n awlsam taka Digital copy an hmuh theih nan an dilnaah Phone number leh e-mail ID tarlan tel a pawimawh thu te sawi niin, Birth Certificate leh Death Certificate lem siam leh tihdanglam chu dan phal loh a nih angin a venna tur leh Certificate lem laka mipui himna tura hmalak dan tur te, inzirtirna hrang hrang kalpui dan turte sawi ho a ni bawk.
Birth/Death Certificate hi pian/thih ni atanga ni 21 chhungin Registrar of Births & Deaths (RBD) hnenah a thlawna lak theih a ni a; hemi hnu lamah chuan ni 22 atanga 30 inkarah Rs. 20/- chawiin RBD atangin lak theih a ni a; ni 31 atanga ni 365 inkar, kum khat chhungah chuan District Research Office/Additional District Registrar of Births & Deaths (ADR) Office-ah Fee Rs. 50/- leh application form man Rs. 20/-, a vaiin Rs. 70/- chawia lak a ngai a; kum khat chin hnu lamah chuan District Magistrate/Executive Magistrate hriatpuiin Fee hrang hrang a vaiin Rs. 220/- chawiin Delayed Certificate lakchhuah theih chauh a nih thu tarlan a ni bawk.
Serchhip DRO Lalthangmawi chuan Birth Certificate Digitized chu compulsory a ni lo tih sawiin, Serchhip DRO Office-ah tih tir theih reng a nih thu a sawi a. Mi thenkhat ten sum tlem tlem chawi-a Office-a tihsak tura an lakkhawm thin chu Official-a an hriatpui loh thu a sawi bawk.