Chief Minister in Hindi pawimawh zia sawiin, kan culture nen-a Hindi thiam turin zirlaite a chah
Mizoram Hindi Prachar Sabha bultumin nimin khan Aizawl-a Dawrpui Multipurpose Hall-ah ‘Hindi Diwas Day’ hman niin he hun hi Chief Minister Lalduhoma chuan khuallian niin a hmanpui a, thalaite chu Hindi thiam tura fuihin, “Hindi thiam hi a tha a ni satliah lo, a tulin a tul tawh zawk a. Amaherawh chu, Hindi kan thiam vang emaw, thiam kan duh vang emaw-a an hnamzia entawn kher kha a tul lem lo. Mizo takin Hindi tawng thiam ila, an hla i sa ang u. Chutianga kan tih loh chuan kan hnamzia kan hloh tial tial ang a, kan Sakhua thlengin min hliau thei a ni. Mizote hian kan tawng leh kan Culture-te hi tiral lovin kan tilian zel zawk tur a ni,” a ti a. Sawrkar laipuiin Hindi a uar tial tial thu pawh sawiin, “Hindi thiam lo tan chuan kan duh leh kan duh loh thilte kan sawi chhuak thei lo fo a. Mi fel tak pawh kha a fel tih a hriat theih loh thin. Chuvang chuan, Hindi hi kan thangthar ten rawn thlahthlam lovang che u,” a ti a. Kaladan Multi-Modal Transit Transport Project (KMTTP) chu nakumah an peih anih tawh dawn avangin Mizo thalaite tan Tawng hrang hrang- Hindi, Kawl tawng, Japanese, leh Chinese tawng Mandarin thiam a pawimawh dawn thu pawh a sawi bawk.
Chief Minister Lalduhoma chuan Member of Parliament (MP) a nih laia Mizoram-a Hindi zirna in hma a sawn theihna tura hma a lak tawhna te tarlangin, MP a nih laia a hmalakna zarah khan kum 1988-ah Mizoram-ah Hindi pawl sawm (Metric) leh PU (Intermediate) Exam phalna (Recognition) Central sawrkar chuan a rawn pek thu leh kum 2000 khan BA Exam phalna a rawn pe bawk tih a sawi a. “Tunah chuan Hindi thiam kan lo ngah ve tawh hle a, Primary leh Middle School-a kan Hindi Teacher te chu Mizoram Hindi Prachar Sabha te chherchhuah an lo ni deuh vek tawh a, Mizoram Hindi College-a kan thawktute chu Mizo nula leh tlangval an ni deuh vek bawk a, Hindi Doctorate Degree nei pawh 20 chuang kan lo nei ta a. Kan hmathlirte kha a takin a rawn chang chho ta zel a ni,” a ti bawk.
He hunah hian Khual Zahawm leh School Education Minister Dr. Vanlalthlana pawhin Education Reforms Committee chuan ‘Hindi Speaking Day’ hman tha a tih thu leh thla khatah ni khat talin bul tan an rel thu a sawi a, hemi atana Guidebook an siam chu School hrang hrang ah an sem tawh thu leh Hindi Speaking Day hmanni pawh an ti zing chho zel dawn tih a sawi a. “Hindi thiam hi hnamdangte nena kan inpawhna leh kan eizawnna atana thil tul a ni,” a ti.
School Education Minister chuan Hindi Subject-a Ph. D neite a lawmpui thu pawh sawiin, Mizoram in Hindi Ph. D hi 20 chuang kan neih tawh thu a sawi a, Mizoram Hindi Prachar Sabha-in Aizawl Traffic Police te Hindi Spoken Course a lo pe chu lawmawm a tih thu pawh sawiin, Taxi Driver te pawhin a tlanglawn chu thiam se thaa a rin thu a sawi bawk a. School thenkhatah Hindi Zirtirtu Hindi tawng a tawng thei mang lo an awm tih pawh sawiin, Hindi hawrawp chhiar thiam ringawt lova, tawngchhuah an thiam theih nan Hindi zirtirtute pawh an ennawn tha leh dawn tih a sawi a ni.
Nimin-a Hindi Diwas Day puala hun hman hi Hindi Prachar Sabha-a Vice President Lalchungnunga chuan kaihruaiin Mizoram Hindi Prachar Sabha-a Chairman RB. Lalmalsawma pawhin thu a sawi a, Hindi Subject-a Doctorate Degree nei tharte hnenah leh Traffic Police Spoken Hindi Course kal chhuakte hnenah chawimawina hlan a ni bawk. He hunah hian zirlai naupangten zai leh lamin hun hmangin sawrkar mi pawimawh thenkhat ten he hun hi an hmanpui bawk a ni.