Serchhip District Prison & Correctional Home-a awm tam

Serchhip District Jail tih thin, ‘Serchhip District Prison & Correctional Home’ ah nimin tlai thleng khan tang mi 98 awmin a tam zawk chu an thubuai ngaihtuah lai an ni.
Chhinchhiahna atanga a lan danin mipa 88 leh hmeichhia 40 awm theihna ‘Serchhip District Prison & Correctional Home’ ah hian nimin tlai-ah khan mi 98 an awm mek a, mipa 86 leh hmeichhia 12 an ni a, an zinga mi 60 te chu an thubuai ngaihtuah lai niin mipa 51 leh hmeichhia 9 an ni a, mi 38 te chu an thubuai ngaih-tuah tawh leh thiamloh chantir tawh te an ni.

Thubuai ngaihtuah tawh leh thiamlo chantir tawh zinga mipa 2 leh hmeichhia pahnih, an vaiin mi 4 te chu hrehawm taka tang tura an chungthu rel sak (Rigorous Imprisonment) te an ni a, midang 34, mipa 33 leh hmeichhia pakhat erawh tang tur pangngaia an chungthu rel (Simple Imprisonment) an ni thung a. Nimin bikah Serchhip District Prison & Correctional Home atanga tang chhuahtir mi pakhat awmin lut thar pahnih an awm a ni.

Mizoram pumah nimin tlai thleng khan Prison & Correctional Home-ah mipa 1594 leh hmeichhia 245 awm mekin nu te an awm avanga awm ve naupang 16 an awm bawk a ni.