CM in Bible House thar a hawng

Bible Society of India (BSI) Aizawl Auxiliary in Aizawl Khatla Raj Bhavan Gate bul-a ‘Bible House’ an sak thar chu nimin khan Chief Minister Lalduhoma chuan a hawng a. BSI in Building thar tha tak a nei ta chu a lawmpui thu sawiin, “Bible Society hi kan zaa min huapzo hmalakna a nih avangin a hlu bik a, kan khawpui laili a Bible House mawi tak a awm pawh hi a inhmeh hle ni,” a ti.

Nimin-a hawn tak Aizawl-a Bible House hi kum 2016 khan a awmna lei a khi a, a thlang-a sawrkarin hma a lakna nghawng zel nia ngaih a ni a. Mithiamten an endik hnuah thiah a ngai nia hriat a nih avangin thiah a ni a. A hmunhma chu tuna a Building thar awmna nen hian sawrkar nen an inthleng a, sorkarin zangnadawmna cheng nuai 407 a pe bawk a. Member te thawhkhawm belh te nen he a building thar hi cheng nuai 1400 chuang sengin sak a ni ta a. A hnuah sawrkar hian cheng nuai 50 a pek belh leh bawk. Kum 2019 August ni 5-ah a bankhur laih tan niin nimin khan hawn a ni ta a ni. BSI Aizawl Auxiliary hnuaiah hian Branch 55 awmin Mizoram, Tripura leh Barak Valley-a District pathum a huam a, Kohhran hrang hrang 30 an thawkho mek a ni.