Ranking-ah PUC leh MZU lang

Sawrkar Laipui-a Mnistry of Education chuan nimin khan India rama University leh College tha a thlanna, ‘National Institutional Ranking Framework’ (NIRF) Ranking tichhuakin Mizoram atangin Pachhunga University College chu College Category-ah 49-na a ni a, Mizoram University (MZU) chu University Category-ah 82-na a ni bawk.

NIRF result hi nimin khan New Delhi-a Bharat Mandapam-ah Union Minister for Education, Dharmendra Pradhan chuan a tlang-zarh a. Union Minister of State for Education, Jayant Chaudhary pawh telin he inkhawmah hian India rama University leh College tha thlanchhuah aiawh mi thahnem tak an tel a, Pachhunga University College aiawhin Principal, Prof. H. Lalthanzara leh Mizoram University aiawhin Registrar, Prof. Lalnundanga te an tel a ni.

NIRF hi sawrkar laipui, Ministry of Education-in India rama zirna In sang (Higher Educational Institution) te inelna tur atana tehfung mumal tak hmanga a buatsaih a ni a. Kum 2015 atanga bul tan niin kumin hi a kum 10 na a ni a. Pachhunga University College hi kum 2020 atang khan telin kum 2022 khan India ram College tha 45-na a ni a, kum 2023-ah 34-na niin kum 2024-ah 35-na a ni a, kumin 2025 hian 49-na ah a awm leh a ni. India ram College 50000 chuang zingah kumin hian College 4030 an tel a, PUC tih loh chu India hmarchhak College zingah ranking 100 hnuai lama lang phak an awm lo a ni. Kum 2025-ah hian College category-ah pakhatna chu Hindu College an ni a, pahnihna chu Miranda House niin pathumna chu Hans Raj College an ni.

Ranking tehna 2023-2024 angin PUC-ah hian UG-ah zirlai 2761 an awm a, heng zingah hian State dang zirlai 45 leh India ram pawn (international students) 12 an awm. PG lamah zirlai 88 an awm bawk. PUC-ah hian Department 23 an awm mek bawk a ni.