Kolasib-ah RIDF hnuaia hnathawh thlirho a ni

National Bank for Agriculture and Rural Development (NABARD) atanga Rural Infrastructure Development Fund (RIDF) hnuaia sum puk hmanga Kolasib District chhunga hmasawnna hna thawh hrang hrangte chu nimin khan thlirho a ni.

Kolasib District Review Committee on RIDF/WIF thutkhawm an Chairman leh District Bawrhsap John LT. Sanga kaihhruai a neih ah hian DLRC Member Secretary, NABARD hnuaia Kolasib District Development Manager JD Traite chuan RIDF leh Warehousing Infrastructure Fund (WIF) awmzia leh NABARD atanga loan pek dan kalhmang tlangpui sawifiahin, Kolasib District chhunga RIDF/WIF kaltlanga hnathawh zawh tawh leh thawh mekte a tarlang a. Kolasib District chhunga Project kal mekte a hun takah tha taka thawh zawh a nih theih nana hmalak dan tur te, sum leh pai mamawh chak zawka dil chhuah a nih theih nana thil pawimawh te leh RIDF/WIF hnuaia hnathawh tur hmabak chungchang te sawiho a ni bawk.

RIDF hi kum 1995-96 atang khan kalpui tan niin, Sector pathum - ei leh bar dehchhuahna leh a kaihhnawih (Agriculture & Allied), Vantlang nunphung tihhmasawnna (Social) leh thingtlang inkalpawhna tih changtlunna (Rural Connectivity) atan te sum puktir (loan pek) thin a ni a. He'ng Sector pathum hnuaiah hian hnathawh theih chi hrang hrang 39 a awm a ni. Kolasib District chhung bikah Department hrang hrang kaltlangin RIDF hnuaia hna thawh zawh tawh 58 awmin, he'ng atan hian RIDF loan cheng nuai 11,982.94 pek a ni a. Hna thawh mek (Ongoing Project) 90 la awmin, hemi atana RIDF loan lak theih zat hi cheng nuai 41,473.32 a ni.