‘Lianchhiari Run’ hlanna I&PR Minister hovin neih a ni

NEC atanga sum hmuh hmanga I&PR Department Directorate Building bula Lianchhiari Run (A Multi Facility Centre) hlanna hun chu nimin khan hman niin I&PR Minister Lalruatkima chuan a hmanpui a ni.

Nimin-a he hun hmanna ah hian I&PR Minister Lalruatkima chuan khawpui laili taka Department thawktute leh mipuiin an chhawr tangkai tur Multi Facility Centre – ‘Lianchhiari Run’ infrastructure tha tak sak a ni chu ropui a tih thu sawiin, Inhmuhkhawmna tur Conference Hall te, Photo leh Art Exhibition neih na tur remchang tak te, Theatre, Vantlang tan lirthei hunna tur Parking area zau tak leh Facility dang dang he building in a ken tel chu tangkai taka hman a nih a beisei thu a sawi bawk.

Lianchhiari Run (A Multi Facility Centre) hi NEC sum cheng nuai 900 leh State Sawrkar sum State Matching Share cheng nuai 100, a vaiin cheng nuai 1000 senga sak a ni a, Lushai Engineers te sak niin December ni 14, 2017 khan sak tan a ni a, kum thum chhunga sak zawh tur ni mah se rokhawlhna hrang hrang avangin a hun takah zawhfel thei a ni lo a. A building ah hian chawng (storey) pasarih awmin, Elevator (kg 560 dawl thei tur) pahnih dah a ni bawk.

Building chhawng hnuai ber/Ground floor (Tennis Court Bus Stand opposite) hi MzSRLM in Self Help Group ten an thil siamchhuah zawrhna Sales Outlet atan an luah dawn a. Chawng hnihna hi Two Wheeler 65 dahna tura duan niin chawng thumna pawh lirthei ke pali nei 20 bawr vel dahna tur a ni a. Chawng li na ah hian Officer Room leh Staff awmna bakah lirthei ke pali nei 8 vel dahna tur hmun a awm bawk a. A chawng nga naah Director leh Staff Room bakah lirthei dahna tur ruahman a ni a a ni a. A chawng rukna ah Conference Hall leh Art Gallery awm lehin, a chawng chung berah mi 100 bawr vel lenna Mini Theatre leh Exhibition neih theihna tur Open Terrace siam a ni bawk.