Champhai-ah nungcha tawlhruk man leh a ni

Champhai-a Excise & Narcotics Department Duty te chuan Inrinni zing khan dan lova nungcha tawlhruk thahnem tak an man a, Champhai Police te hnenah hlan nghal a ni.

Thudawn dawnin heng nungcha tawlhruk an man te hi Tlangsam Thlanmual bulah lirthei pathum hmanga Myanmar atanga dan lova tawlhruk nia hriat niin lirthei khalhtu Lalremruata (38), Champhai Vengthlang; Tinkhuma (38), Champhai Venglai leh E. Lalmuanpuia (29), Champhai Venglai nia inchhal te pawh man nghal an ni a, heng nungcha chi hrang hrang an man te hi a vaiin 140 a ni a, tualchhung rate a chhutin cheng nuai 138 hu vel tura chhut a ni.

Heng nungcha an man te hi an phurhna motor nen Champhai a Superintendent, Custom Preventive Force hnenah hlan niin anni hian Champhai District Court-ah an kalpui a, Court chuan Environment, Forest & Climate Change Department kutah hlan chhawngin anni hian Aizawl Sahuan-a dah turin an buaipui dawn niin thudawn a ni. Tun tuma nungcha an man te hi Satel 30, Zawngte 2, Zawng chi khat (Marmoset monkey) 2, Saphai 22, Sumatra Laiking chi khat (Sumatran Water Monitor) 18, Awle 55, Sava mawi (Flame bowerbird) 4, Keite chi khat (Serval cat) 4, Zawng te chi (Marmoset) 2 leh Kangaroo chi khat (Albino wallaby) pakhat te an ni.