Vawk suat zangnadawmna pe fel thawkhat

AH&Vety Department-in Vawk pul hri, African Swine Fever (ASF) vanga kum 2021 chhunga Vawk suat neitute hnena zangnadawmna pek tur Bank-ah a thawn hnuah Bank chuan zangnadawmna dawngtu turte Account-ah pawisa an thun fel thawkhat tawh.

AH&Vety Director Dr. Lalrinpuii Sailo sawi danin, kum 2021 chhunga Vawk suat zangnadawmna chu a dawngtu turte hnenah pek fel thawkhat tawh a nih laiin, document (bank account) fel tawk lo thenkhat, pawisa la luh lohna a la awm a, chungte chu buaipui chhunzawm zel a ni a. Vety Director sawi danin ASF vanga Vawk thi neituten zangnadawmna an dawn zel theihna turin sawrkar laipui ah hma an la leh mek a, chungah chuan zangnadawmna dawng awm ngawih ngawih, la dawng lote pawh telh an ni dawn a. State hrang hrang zingah ASF vanga vawk suat zangnadawmna pek awmchhun chu Mizoram niin, ASF chungchang a report pe tha ber pawh a ni.

Mizoram sawrkar chuan kum 2021 chhunga Vawk suat neitute zangnadawmna pek tur sawrkar laipui-ah a dil a, Vawk 10,910 atan Rs. 11,69,94,414 dilin, First Instalment Rs. 5,84,97,000 chu March 22, 2022 khan sawrkar laipuiin Mizoram sawrkar a rawn pe a. Sawrkar laipuiin a pek zat chiah Mizoram sawrkarin a pek ve a ngai a, a vaiin Rs 11,69,94,000 a tling a. Mizoram sawrkara Finance Department chuan sawrkar laipuiin a rawn pek leh Mizoram sawrkarin a pek ASF zangnadawmna sum, chhungkaw 2,488 hnena pek tur Rs. 10,48,42,200 chu July 1, 2022 khan AH&Vety department hnenah a pe a ni.

Comments

Popular News (Last 30 Days)

LPG man bithliah thar