Aizawl-ah Mega National SC-ST Hub Conclave nei

Sawrkar laipui Ministry of Micro, Small and Medium Enterprises (MSME) buatsaihin Inrinni khan Aizawl Dawrpui Multipurpose Centre-ah Mega National SC-ST Hub Conclave neih a ni.

He Conclave hi Commerce & Industries Minister Dr. R. Lalthangliana chuan hawngin Mizoram hmun tam zawk chu tlangram vek a nih thu leh Industry lian tak tak din a rem loh thu a sawi a. MSME chhinchhiah danin Mizoram-a Industry ding zinga zaa 97.36 chu Industry tenau (Micro Enterprises) niin, chung zinga a tam ber chu cheng nuai 10 tling lo senga bultan an ni a, an zinga a chanve vel phei chuan loan la lovin anmahni sum khawl atangin bul an tan a ni, a ti a. Bul tan tura loan lak kawngah leh thil hrang hrangah kaihhruai kan la ngai hle tih sawiin, Ministry lam atangin theihtawp chhuahpui tur leh an inkaihhruaina hman laite pawh Mizoram leh India hmarchhak State te tan tlema thlahdul hlek a tul nia a hriat thu a sawi a, Bank ho pawh loan pekchhuah kawngah in hawng zau a loan dilte pawh rang taka tihchhuah kawngah tan la thar leh tura a duh thu a sawi a ni. 

National SC-ST Hub hi kum 2016 khan Prime Minister Narendra Modi chuan a hawng a, a programme in a tum ber chu India rama Scheduled Caste leh Scheduled Tribe zinga mahni kutkawiha eizawnna ngelnghet nei duhte bultanna tura kawng sial sak leh tanpui a ni a, hetiang lama tui leh ngaihven duh tan MSME website https://msme.gov.in/ ah lutin a zirchian theih reng a ni.