Kum kalta ah College zirtirtu 70 chuang hnawhkhat

Aizawl City College Joint Students' Union (ACCJSU) Meet nimin-a neih chu Higher & Technical Education Minister Dr. R. Lalthangliana chuan hmanpuiin RUSA hnuaiah kum kalta chhungin College zirtirtu post 70 chuang hnawhkhah a nih thu a sawi.

Cultural Centre cum Auditorium, Vaivakawn-a ACCJSU Meet-ah hian H&TE Minister chuan zirtirtu indaihloh chungchang ah post ruak tam tak karah Teaching Faculty Sension an awm zel a, College hrang hrang Principal te nen pawn sawihona neih fo tawh a nih thu sawiin, Mizoram chuan kum kalta lamah RUSA hnuaiah College zirtirtu 70 chuang post a hnawhkhah thu leh an hlawh tur hi Ministry of Human Resource Development, Govt. of India atanga lo kal tur a ni tih a sawi a. An ni lam hian an tihtur an hlen theihnan kar kalta lamah DO letter thawn a nih thu a tarlangin, hun reilote chhungin chinfel a rin thu a sawi.

RUSA hnuaiah hian India ram pum ah zirtirtu 300 an lak laiin Mizoram in 70 chuang kan chang chu a lawmawm takzet tih Minister chuan sawiin, an ni hi awmlo se kal a buaithlak viau in a rinthu leh Covid avanga ram in harsatna sum leh pai dinhmunah a tawn a vangin a nghet (regular) a thawk tur lak mai chu hun a la duh hlek ang tih  a sawi a. Hetih mek lai hian zirlaite harsatna sawrkar chuan hriain pandemic ah zirtirtu mamawhna a nasa leh zual tih hriat a ni a, Casual Teacher 100 vel lak a nih thu a tarlang a, “Sawrkar kum tharah a kawng awm thei se tih chu kan duhthusam a ni,” a ti bawk.

Minister chuan Scholarship pekchhuah chungchangah sawrkar chuan a hun dik takah zirlaite Scholarship pek a tum thu sawiin, zirlaite hamthatna leh hmasawnna tur atan MYC pawhin tan nasa takin ala a, heng bakah hian College zirlai naupang la Graduate lo ten engtin emaw a Competitive Exam hrang hrang an beihna atana an lo inbuatsaih lawk theihna tur kawng pawh a remchang hmasa berah dap a ni ang, a ti.

ACCJSU Finance Secretary Johny Vanlalmuana kaihhruai he hunah hian  Minister Dr. R. Lalthangliana chuan Pandemic avangin College Admission indaihlohna zirlai ten an neihloh nan College Seat Accommodation pawh 30% in tih pun a ni tih sawiin, hemi a hlawhtlin theih nana inhawng tak MZU Vice Chancellor leh College Principal te hnenah lawmthu a sawi bawk a. College infrastructure tih changtlun nana pawimawh em em, hmun awl leh campus zau nei te ah Hostel sak belh a nih theihnan Union Ministry lam a biak tawh thu sawiin, an ni lam pawhin an lo dawngsawng tha hle tih a sawi a. Amaherawhchu Central sawrkar pawh Covid avangin a buai ve hle mai a, dawhthei taka kan lo awm a tul  thu a sawi bawk.