Mi 261 in pension lehkha (PPO) pe kir tawh

Dan dik tawk lova Family Pension la mi 261 te chuan an Pension Payment Orders (PPOs) te sawrkarah an pe kir tawh.
ZPM Thalai thuchhuah tarlan danin Mizoram sawrkar hnuaiah Family Pension la mi 11,194 awm mekin heng zinga dan dik tawk lova Family Pension la mi 261 te chuan an Pension Payment Orders (PPOs) te sawrkarah an pekir tawh a, Family Pension lak hi a hniam ber Rs. 12,702/- anga chhut pawhin kumtin cheng vbc. 3.97 an hum thei der tawh niin ZPM Thalai thuchhuah chuan a tarlang a ni.

Tarlan tawh thin angin Mizoram Sawrkar, Finance Department chuan dik tawk lova Family Pension la te chu September ni 30, 2026 hma ngeia kir vek turin thuchhuah a lo siam tawh a. Thla thar October ni 1 atang hian dik lo taka Family Pension late zawnchhuah hna thawk turin District tinah Task Force te thawkchhuak turin thuchhuah a siam tawh bawk a. Task Force-te hian endik hna an thawhna kawngah Central YMA in Branch zawng zawngte lo thawhpui tura ngenna a lo siam tawh angin an kalna hmun apiangah a tul ang zelin Branch YMA leh pawl dangte pawh a thawhpui dawn a ni. Huntiam chhuga a PPO kir leh te chu an kir ni thleng pension pek tur a ni ang a. Huntiam chhunga PPO pekir lo, dan dik lo a Pension/Family Pension la hmuhchhuah an nih chuan Task Force Leader hmingin Proforma duan sa angin insawifiah tura hriattirna pek tur a ni a, chumi hnuah a tul dan a zirin Police Station hnai berah BNS/IPC hmangin thubuai ziahluh a ni dawn a ni.