Kum 2047-a India GDP-a 1% lo thawhchhuah ve theih an tum thu Chief Minister in a sawi
NITI Aayog buatsaihin nimin khan Mizoram Assembly House Conference Hall-ah India hmarchhak Bial tan ‘Strengthening SITs to drive Viksit North Eastern Region’ tih thupui hmangin Regional Workshop neih a ni a, he hunah hian Chief Minister Lalduhoma chuan NITI Aayog in State Support Mission hmanga Mizoram-a hma an lakpui chu an tangkaipui hle tih sawiin, “Mizoram State Institution for Transformation (SIT) hi a tichak a, plan kan siamna kawng ah te, a taka kan kalpuina kawngahte sawrkar laipui hmathlir milin hma kan lak theih phah,” a ti a. NITI Aayog Governing Council hnuhnung berah khan Mizoram-a State Support Mission kalpui zel turin a dil thu sawiin, “Mizoram State Assembly-ah ngei pawh State Support Mission (SSM) kan mamawhzia ka lo sawi tawh a. Ka dilna ngaipawimawhin NITI Aayog chuan kum 5 dang atan SSM hi min han pawhseisak leh ta a. Kan lawm hle a ni,” a ti.
Mizoram chuan kum 2047-a kan ram hmathlir document – Raltiang Ram an tlangzarh tawh thu Chief Minister chuan sawiin, “Kum 2047-a India GDP-a 1% lo thawhchhuah ve theih kan tum a. Kan tum ram hi a sang hle a ni. Tum ram (target) lo neih ringawt kha a tawk lova, a taka tihlawhtling tura ke kan pen a ngai a. He kan tum ram thleng tur hian kan economy ruhrel hi thlak a ngai (structural transformation) tih pawh kan hria a ni. Kan tum ram min hruai thleng ngei tur ruahmanna (plan) chu SIT hmangin kan siam a. Chumi hre rana ke kan pen tlan theih nan Minister zawng zawngte tana intuaitharna (retreat) pawh buatsaih kan tum mek a ni,” a ti bawk a. Hmarchhak State te hian Viksit Bharat hmathlir tihhlawhtling turin mahni in engkim kan ti vek thei lo tih pawh Chief Minister chuan sawiin, “Kan zaa kan tanho a, kan thawhho zel a ngai a. Mizoram phei chu International ramri pahnih karcheh-a awm kan ni a. Hmarchhak Bial huapa hma kan lakho a tulna hi a tam hle,” a ti bawk.
He Workshop hawnna hunah hian Dr. KS Rejimon, Mission Director, SSM, Niti Aayog chuan Workshop buatsaih chhan te sawiin, NITI Aayog Member Dr. Joram Aniya Chief Secretary Khilli Ram Meena leh Planning & Finance-a Commissioner Vanlaldina Fanai ten thu an sawi a. Hemi hnu hian Dr. Shashank Shah, Senior Specialist, NITI Aayog chuan State hmathlir siam dan tur (Formulating State vision – roadmap 2047) tih thupui hmangin thu a sawi a, Sambuddha Goswami, Consultant chuan District Domestic Product estimate dan leh Primary Sector GDP estimate dan te sawiin, Chawhnu lamah SSM hmanga SIT tihchak dan zirhona leh sawihona an nei zui leh a ni bawk.