Kumin-ah naupiang 10,643 leh thi 4,156 awm tawh

Economics & Statistics Department in a tarlan danin kumin (2026) January atanga June thla thleng khan Mizoram pumah naupiang 10,643 leh thi 4,156 an awm tawh.

Chhinchhiahna atanga a lan danin kumin chhunga Mizoram-a nau piang chhinchhiah 10,643 te hi mipa 5,269 leh hmeichhia 5,374 an ni a, heng zingah hian kum khat hnuilam thi 86 awmin thi sa a piang 59 an awm bakah kum 5 hnuailam thi mi 24 an awm bawk a ni. Economics & Statistics Department hian nikum (2025) chhung khan Mizoram-ah mitthi 8,080 a chhinchhiah a, mitthi te hi mipa 5,183 leh hmeichhia 2,897 niin hmeichhe thi zat aia mipa thi zat tamna hi 2,286 lai a ni a. Kum khat hnuailam thi pawh nikum khan mipa 129 leh hmeichhia 106 chhinchhiah niin, an vaiin 235 an ni a; kum 1 leh kum 5 inkar thi pawh mipa 26 leh hmeichhia 20 bakah, thi saa nau piang 115 an awm a, mipa 65 leh hmeichhia 50 an ni bawk.

Piang leh thi zatah hian nikum chhung khan mipa thi zat (5,183) aia piang zat (11,076) tamna hi 5,893 a nih laiin, hmeichhe thi zat (2,897) aia piang zat (10,797) tamna chu 7,900 a ni thung. Economics & Statistics Department data atanga a lan dan chuan nikum chhung khan piang zat atanga thi zat paih hnuah mipa aiin hmeichhia 2,007 in an pung tam zawk a ni.