Insiamthat ngaite insiam tha zelin, mipui beiseina ti hlawhtling tura MNF an inbuatsaih mek thu sawi

MNF Treasurer leh Minister hlui, Lalruatkima chuan insiamthat ngaite insiam tha zelin, mipui beiseina ti hlawhtling tura an inbuatsaih mek thu a sawi.

MNF Party chuan nimin khan Mizo Hnam Run, Aizawl-ah Chhung Inkhawm neiin he hunah hian MNF Treasurer Lalruatkima chuan MNF-in zalenna a sual chhan sawiin, “Kan hnam, kan ram, kan Sakhua a him nan leh zalenna sang ber kan neih theih nan MNF chuan zalenna a sual a. Kan hnam pasaltha leh martar-te avangin hman zahawmah kan chhuak a ni,” a ti a. “Nationalism tel lo a Mizo hnam leh Mizoram kaihhruai hi a pawi thei a ni. Tunhnaia Shillong buaina pawh a ram neituten ram leh hnam humhimna kawnga an tlai vanga thleng a ni. Kum 1966-a thlarau kan chan ang, ram leh hnam hmangaihna khan thalaite thinlungah thu sawi leh rawh se,” a ti bawk.

Remna thuthlung in a kentel Article 371G in a huam FCA Act, 2023 chu ZPM sawrkarin a adopt nia sawiin Lalruatkima chuan, “Halral thilhlan-a an hlan ta mai hi a pawi em em a, thangtharte hian ZPM sawrkar hi an la rawn dem ang. Remna thuthlung bawhchhiatna a ni a, remna thuthlung bawhchhe hmasa ber sawrkar an ni. An inhmuhchhuah hunah meuh chuan a tlai tawh ang,” a ti a. “Remna thuthlung Chief Minister-in a sawi bawrhbangte hi a pawi hle. Remna duh avanga IPS bang niin a insawi thin a, 'Remna thuthlung point tinah ka tel' tituin enga tinge a sawi bawrhban leh si? ‘Ui-in a luak hnu a ei leh’ tih ang chauh a ni,” a ti bawk.

RD Minister lo ni tawh Lalruatkima chuan MNF an sawrkar lai khan COVID-19 hripui karah pawh ni 100 inhlawhnaah hian mipuite ni 100-ah ni 100 an inhlawh thei nia sawiin, a thawktute hlawh pawh lak theih loh a awm lo mai ni lovin, 2024 March thla thlenga an hlawh tur an tifel sa niin a sawi a, “Ni 100 inhlawhnaa thawktuten ZPM sawrkar hnuaiah hlawh an la tha lo hle a. Thla 3 te, thla 5 te hlawh an la lo fo a. Thawktute an buaiin an lainat awm takzet a ni. MNF sawrkar an ngai ngawih ngawih a ni,” a ti a. “ZPM sawrkar hnuaiah mipuite phurrit Buhfai man a let a tih to te, School upgradation tawh hnuhhniam leh te, Electric Smart Meter kalphung ennawn te a tul dawn a ni,” tiin “Mipui phurrit tam tak ZPM-in a siamte chhawk zangkai tur leh Mizo nationalism chawi nung turin MNF kan inbuatsaih a ni,” a ti bawk.