DSWM thukhawmin lirthei thar pahnih vailiam a ni
Serchhip DC Meeting Hall-a Serchhip District Water & Sanitation Mission (DSWM) thutkhawm ah hian August ni 15, 2026 atangin Serchhip District-a Sailulak, Sialsir, Leng leh Chhuanthar Tlangnuam-ah te Bawlhhlawh chi li (4)-a thliarhranna chu kalpui tan a nih dawn thu tarlan niin Bawrhsap Paul L. Khuma chuan bawlhhlawh sawngbawl dan kalpui mek hi District hmalakna mai ni lovin Supreme Court thupek anga India ram puma hmalakna a nih thu leh a hlenchhuah kawngah Village Council hruaitute chu an pawimawh hle dawn tih a sawi a. Khaw dangah pawh tih chhoh zel tur a nih thu sawiin, khaw dangte tana entawntlak nih tum zel turin he huna tel Sailulak, Sialsir, Leng leh Chhuanthar Tlangnuam VC te chu a chah bawk.
Serchhip District Water & Sanitation Mission (DWSM) hian State Water & Sanitation Mission (SWSM) atangin bawlhhlawh paihna leh khawnkhawmna tur Motor pahnih dawngin Bawlhhlawh phurhna atana Green Herd SP ten an enkawlzui dan tur te; Bawlhhlawh chi li (4)-a thliar hranna kalpuina tura Pilot Village atana thlan thingtlang khaw 4 – Sailulak, Sialsir, Leng leh Chhuan-thar Tlangnuam-a hmalak zui dan turte; thingtlang a bawlhhlawh paih man (fee) pek dan chungchang te leh dan zawm tha lo te hremna chungchangte pawh sawiho a ni bawk.
Nimin-a thutkhawm neih zawh hnu hian SBM (G) atanga dawn Bolero Pikup pahnih (2) vailiamna hun DC tualzawl-ah neih niin, Serchhip Dsitrict-a khaw enkawlfai kawnga thawk tha, khaw 15-te hnenah Community Dustbin (bawlh-hlawh bawm) 205 sem nghal a ni bawk. He hunah hian DSWM Member Secretary, Sr. EE, PHED Isaac Lalchhuanmawia leh member dangte an tel bawk a ni.