Mizo Literature te a tam thei ang ber tawng dang a dah leh Internet-a dah a pawimawh thu sawi
Nimin khan Aizawl Bible House-a Bible Hall ah Prof. Laltluangliana Khiangte chanchin mithiam hrang hrangte ziak dahkhawmna lehkhabu, ‘Zawhzawzo Val’ (FestsChrift - An damlaia mithiamte chawimawina lehkhabu) leh Prof. Laltluangliana Khiangte ziak lehkhabu dang pahnih - ‘Lalzika leh Vanthangi’ Sap tawng-a ziak leh Teaching of Mizo Language in Secondary School tih Dr. Lalramliana nena Sap tawng-a an ziakte (co-author) te chu tlangzarhin he hunah hian Chief Minister Lalduhoma chuan, “Kan ziakmite nen hian hun kan lo hmangho zauh zauh tawh a, ka ngaimawh thilte ka lo sawi ve thin a. Vawiin-a kan tlangzarh lehkhabu pahnih; Pasaltha Khuangchera Play leh Lalzika & Vanthangi Drama-te hi ka ngaimawh thil, ka lo sawi ve fo thin tihhlawhtlinna zinga mi an ni,” a ti a. “Mizo Literature hi hnam dang tawng-in a tam thei ang ber letling ila, Sap tawng te, Hindi te, Bengali te, a theih chuan khawvela tawng lian dang dangte pawh hian letling ila, Internet khawvel ah dah chhuak zel bawk ila, kan ram leh kan hnam phochhuahna tha tak an ni zel a, Mizo tawng kan humhalhna ni zel bawk a ni,” a ti.
Chief Minister chuan Mizo tawng chu Internet-a kan dahluh tam a tul thu pawh sawiin, “Mizo tawng thumal leh chumi tlukpui Saptawng leh Hindi (a lehlinna) kan neih tam khan AI thiamna hmanga Mizo tawng a hna kan thawhna lamah min tanpui a. Hnamdang ten Mizo tawng anmahni tawng-a an lo lehlin zung zung theih nan a tanpui thin a ni,” a ti a. Kum 2022 atangin Google Translate chuan Mizo tawng an senglut ve tawh tih pawh sawiin, “Tunah chuan Google leh Language based AI zawng zawngte hi Mizo tawng-in kan hmang ve thei vek tawh a. Hei hi khawvel changkang zelah kan mamawh em em thil a ni,” a ti bawk.
Chief Minister chuan Prof. Laltluangliana Khiangte chu a thiamna leh a hnathawhna avanga Zofaten kan hriat lar em em a nih thu leh Zirna lama a sulhnu leh a hnathawhna lama a sulhnute atang ringawt pawhin thu leh hla lama a kutchhuak zawng zawngte hi nawtreh vek pawh ni ila mi chhuanawm tak a ni tawh hrim hrim nia a hriat thu sawiin, hetiang mi Zofa ten kan nei chu kan vannei hle tih a sawi bawk.
Nimin-a tlangzarh tak Prof. Laltluangliana Khiangte chanchin ziahna, Zawhzawzo Vala a lan danin, Prof. Laltluangliana Khiangte hian Play a ziak 40 zinga 20 hi Hindi tawng-a lehlin a ni tawh a, a dang 10 chu Sap tawng-a lehlin a ni a. A play ziah 20 vel leh a thu (prose) ziah 20 vel bakah a hla chhammi (poets) 10 te chu India rama University hrang hrang panga velin an zirlaibu-ah an khunglut tawh a, tawng hrang hrangin an letling hlawm bawk a ni.