Kum 10 chhung tang turin Court in chungthu rel sak

Hmeichhe naupang kum 12 mi mipat hmeichhiatna hmanpui thintu a puh Vairengte IOC Veng a cheng Lalramtiama (56) chu Kolasib Fast Track Court chuan thiamloh chan tirin kum 10 chhung hrehawm taka tang tur leh Rs. 50,000/- chawi turin a hrem.
    Vairengte-a nu pakhat chuan May 22, 2023 khan Vairengte Police Station-ah FIR theh-lutin a fanu kum 12 mi, zirlai naupang chu Vairengte IOC Veng-a cheng Lalramtiama, chutih hun laia VC member chuan hmeichhiat mipatna a lo hmanpui thin tih a fanu ka atangin May 21, 2023-ah a hrechhuak tih a sawi a. Hetiang thil hi tum hnih tum thum lai a lo thleng hman tawh nia hriat a ni bawk a. He thil thleng nia sawi hi Vairengte Police te chuan uluk taka chhui zuiin Section 6 of POCSO Act hnuaiah thubuai ziaklutin Investigating Officer chuan Kolasib Court-ah thubuai chhuina report kimchang (Charge-sheet) chu a thehlut a. Court chuan he thubuai hi ngaihtuah nghalin thuhretu hrang hrang te ko in thu a zawtfiah bawk a, Court chuan thutlukna siamin Lalramtiama hi thiamloh a chantir a, nimin khan a hremna tur hi puangin kum 10 chhung hrehawm taka tang tur leh Rs. 50,000/- chawi turin a chungthu hi a rel sak a. A pawisa chawi tur hi a pe lo a nih chuan thla ruk (6) dang a tan belh leh dawn a ni.