Sawhthing rate sang chho chu Pathian hnathawh a ni tih an hriat thu Chief Minister in a sawi

Chief Minister Lalduhoma chuan Sawhthing chu kan ram leilung tichhe tam lo zawng leh a hralhna lama kan lo hlawkpui zawk theih nan Organic kan uar a tul thu sawiin, tun dinhmuna beisei aia Sawhthing rate a sang chho chu engkim chunga roreltu Pathian hnathawh a ni tih an hriat thu a sawi.

Champhai District-a Samthang khua chuan Inrinni khan Samthang Community Hall-ah ‘Sawhthing Kut’ hmangin he hun hi Chief Minister Lalduhoma chuan khuallian nia hmanpuiin a Politics zin kawng leh Sawhthing Market chuan inanna tak a nei nia a hriat thu a sawi a, “A kawng a bum boh a. Mahse, Pathian hun ruat lo thleng hi tuma dan rual a ni lo. Nikum-ah inzir chawpin hma kan la a, harsatna tam tak kan tawk nain kan pekchhuah tur Support Price zawng zawng kan pe chhuak thei,” a ti a. Kumin ah pawh a tir lamah a rate hi a tha mai lo tih sawiin, “Kan huntiam thlen hmaa a rate hniama lo hralh ta mai khua an lo awm bawk a. Nimahsela, Pathian zarah kan tum ang ngeiin kan huntiam atangin kan lei tan leh a. Tunah phei chuan kan beisei phak bakin Sawhthing rate a rawn sang ta a. Hei hi kan tih a ni lova, engkim chunga roreltu Pathian hnathawh a ni tih kan hria a ni,” a ti.

Mizoram Sawhthing chu a quality a that thu leh damdawi anga hman theih a nih thu Chief Minister chuan sawiin, “Essential Oil a ngah a, Fibre a nei tlem si a, Ministry of DoNER-ah Unique Selling Proposition (USP) min kalpui turin kan dil a. Min rawn phalsak ta a. USP - Sustainable Cultivation & Value Chain Management Project kan siam a. Project Cost hi cheng vbc. 190 vel a ni a. A processing Unit dinna tur bik atan cheng vbc. 30.13 kan ruahman a. Nilaini liamta khan a project hawnna hi online-in DoNER Minister nen kan nei a, a hawnna programme kan hman zawh rual hian Processing Unit kan dinna tur bik sum cheng vbc. 30.13 hi an rawn sanction nghal a ni,” a ti bawk.

Chief Minister chuan Sawhthing market a that tial tial theih nan Sawhthing hrisel kan thar a ngai tih pwh sawiin, “Kan ram leilung a tihchhiat nasat loh nan Sustainable Cultivation kan kalpui a ngai a. Chumi lam hawi zawnga kal hret hret a, engtikah emaw chuan Organic State-a inpuan kan duh a ni,” a ti a. A pulung-a kan hralh ringawt chuan bo thlau a tam thin thu leh a hlawk tawk lo tih sawiin, “A sawngbawlna hi hmun hrang hrangah neih chhoh zel kan tum. Champhai District hi Sawhthing kan thar tamna District a nih angin Mualkawi-ah Processing Unit pui ber din a, a chawmtu tur a tenau deuh zawk pathum Tualcheng, Vaphai leh Zotlang-ah din kan rilruk a. Helai Bial mipui zawng zawngten in chhawr phak vek dawn a ni,” a ti bawk.

Samthang khua ah hian chhungkua 230 vel a cheng mek a, a tam zawk hian Lo neiin ei an zawng a, Sawhthing bakah Fur Zikhlum an ching nasa bawk a. Chief Minister chuan “Khaw taima, Sawhthing, Fur Zikhlum leh Samtawk tharchhuak nasa in ni hi a chhuanawm ka ti a. Tam lehzual in tharchhuah zel theih nan duhsakna ka hlan che u a, theihtawp kan chhuah tlang dawn nia, a ti bawk.

Samthang khuaa Sawhthing Kut hi Organising Chairman Lianzika chuan kaihruaiin Samthang VCP Lalchungnunga chuan kalkhawmte lawmna thu a sawi bakah Sawhthing Association President Lalparliana ten thu an sawi a, he hunah hian Adviser to Chief Minister (Handholding) Dr. KC. Lalmalsawmzauva chu khual zahawm niin sawrkarin Sawhthing a lei atanga chiang taka lo lang chu Samthang leh a chhehvel tlang dungte chu an taima a, an thawkrim tih a nih thu a sawi a. Mizoram pumah tunah hian nikum aiin Sawhthing kan la hralhchhuak tlem tih sawiin, kumin bika Support Price an pek tawh chin chu cheng vbc. 18 vel a ni tawh tih a sawi a. Kumin hian Sawhthing hralhna, Secondary Collection Centre (SCC) 24 velah Rs. 50 leh a chunglama an hralh avangin nikum ai chuan Support Price hi an seng tlem zawkin a rinawm tih a sawi bawk.