Mizoram Rural Bank an hlut thu CM in a sawi

Chief Minister Lalduhoma chuan Mizo ten India rama Regional Rural Bank thangduang tak, Mizoram Rural Bank kan nei chu a hlu hle tih a sawi.

‘Mizoram Rural Bank Branch Manager Conclave 2026’ chu Inrinni khan Aizawl-a Mizoram Rural Bank Head Office-ah neih niin he hun hi Chief Minister Lalduhoma chuan khuallian niin a hmanpui a, MRB hmasawnna chanchin a lo hriatin a lawm thin tih Chief Minister chuan sawiin, Mizo ten India rama Regional Rural Bank thangduang tak, Mizoram Rural Bank kan nei chu a hlu hle tih sawiin, “CD Ratio nei tha ber pawl Bank in ni reng mai hi a chhuanawm a ni. Bank te CD ratio a san hian an sum dawn khawm te mipuite tan an pechhuak tam tihna a ni a. Ram hmasawn nan chu chu a pawimawh a ni,” a ti.

Bank Manager te chu sawrkar policy a taka chantirtute an nihna chen a awm thu paw Chief Minister chuan sawiin, “Kan flagship programme Bana Kaih-ah phei chuan in ni lehzual a. Kan ram hmasawnna tura tih theih in ngah hle a, kan beisei sang che u a ni,” a ti a. “Kan ramah financial literacy sang zawk mamawhna a nasa a, thingtlang lama kan mipuiten Bank an mamawh em em che u a. An tana dawr awlsam leh zangkhai neih a tul bawk a. Heng kan mipuite mamawh phuhru theitu ber tur chu MRB te hi in ni. In lo tih tawh te tha taka chhunzawm zel chungin zau zawka hma la zel turin ka ngen a che u. Nikum chhunga hmasawnna ropui tak in thawhchhuahah ka lawmpui che u a. In tan sawrkar hi a ding reng tih hre chungin hmasawn zel i tum ang u,” tin a chah bawk a ni.

MRB hi September 27, 1983-ah ding tanin Govt. of India in share 15%, Sponsor Bank SBI in 35% leh Govt. of Mizoram in 50% an nei a. Regional Office 2 bakah Branch 106 an nei tawh a, chung zinga 60 chu thingtlang-a awm niin thawktu mi 491 an awm mek a ni. Tun sawrkar kum liamta ah khan Deposit cheng vbc. 6526.10 an hmu a, an target chu cheng vbc. 682.11 in an khum a, an thanna rate hi 11.26 an ni. An loan pekchhuah zat chu cheng vbc. 4129.98 a tling a, an tlin zat tura an bituk (Advances target) chu cheng vbc. 300 chuangin an khum a. Nikum chhunga an hlep chu cheng vbc. 152.27 niin, an Credit Deposit ratio chu 63.28 a ni a, Mizoram-ah an sang ber a ni.

An kum khat sum che vel hi cheng vbc. 10,656.08 a tling ta a. Branch tinin cheng vbc. 100 kalpui vek anga ngaih theih (100 crore Business per Branch) niin hetiang nei thei Regional Rural Bank hi India ramah pali chauh an la awm a. An sum che vel zawng zawng 97.36% hi Digital Financial transaction-in an kalpui tawh a, NE India-ah an sang ber a, India ram huap chuan pahnihna an ni. Mizoram sorkar flagship programme Bana Kaihah loan 279 an pe chhuak tawh bawk a ni.