Mizoram-ah mi tinin eikhawp hnianghnar an neih reng theih nan theihtawp an chhuah dawn tih sawi

Mizoram-a rawn zin Union Minister of State for Consumer Affairs, Food & Public Distribution (CAF&PD) Nimuben Jayantibhai Bambhaniya-i chuan Mizoram-ah mi tinin eikhawp hnianghnar an neih reng theih nan theihtawp an chhuah dawn tih a tiam.

Kar kalta a Mizoram-a rawn zin Union Minister of State for Consumer Affairs, Food & Public Distribution Nimuben Jayantibhai Bambhaniya-i pual hian Inrinni zan khan Food, Civil Supplies & Consumer Affairs Department chuan Aijal Club-ah zanriah buatsaihin he hunah hian Prime Minister Narendra Modi hruaina hnuaiah mi vbc. 81-in a thlawnin ration an dawng reng tih sawiin, hei hi Europe rama mihring awm zat aia tam a nih bakah khawvel puma ei leh bar khamkhawp inngaihtuahsakna, Food Security Program lian ber a nih thu a sawi a. Hei hi PM-in 'Mi zawng zawng tan Chaw' (Food for All) a ngaih pawimawh vang a nih thu sawiin, Mizoram-ah pawh mi tinin eikhawp hnianghnar an neih reng theih nan theihtawp an chhuah dawn tih a tiam a. FCS&CA Department hmalakna leh hlawhtlinnate fakin, “e-KYC, EPOS leh SMART PDS te hian mi tam tak a tanpui a ni,” a ti a. Hmarchhak Bial-ah Fur ruahtui tlak nasat avanga inkalpawhna kawngpui a chhiat fo thin thu sawiin, hmarchhak State-te hnenah Fur thlen hmain thla 3 daih ration pek lawk an nih theih nan tanpui a inhuam thu a sawi bawk.

Union Minister of State Nimuben Jayantibhai Bambhaniya chuan Mizoram a lo kal thei hi a lawm thu sawiin, Mizoram chuan GI tag nei tawh Mizo Sawhthing leh Mizo Hmarcha te mai bakah khawvel hriat khawpa hmingthang Cheraw lam ang hian thil danglam leh tualchhuak thil engemaw zat a neih thu a sawi a; amaherawhchu Mizoram a tlawh chhan chu a mawina leh hlawhtlinna te thlir ringawt tur ni loin State-in harsatna a neihte zira, a tul anga chingfel tura a lo kal thu a sawi a ni.

He hunah hian Supply Minister B. Lalchhanzova pawhin Mizoram tlawha State harsatna hrang hrangte a hmun ngeia a rawn zirchian avangin MoS Nimuben-i hnenah lawmthu a sawi a. Mizoram eikhawp (food supply) a awm reng theih nana an tanpuina avangin Sawrkar laipui leh FCI-te hnenah lawmthu a sawi bawk a. Mizoram pawhin sawrkar laipui nena thawhdunna tha tak neih zawm zelin, mi tinte chanvo tur chu a bothlau a awm lohnan tan nasa lehzuala an lak tur thu a sawi a. 'Mi zawng zawng tan Chaw khawpkham' (Food for All) a thlen ngei theih nan Mizoram NFSA quota tihpun sak turin Union MoS chu a ngen bawk a ni.

Inrinni zan-a he hun hman ah hian FCS&CA Secretary Ravi Dadhich chuan PowerPoint presentation hmangin an department dinhmun leh hmalakna te tarlangin, State sawrkar kalpui mek- Non-NFSA(Card var) leh MSSRP(Card Sen) programme-te a hrilhfiah a, FCI General Manager (NEF Region) Sandeep Deora pawhin an hmalakna te a sawifiah bawk a ni.