Assembly Speaker hovin Hmar Martarte Ni hman a ni

Inrinni khan ‘Hmar Martarte Ni’ vawi 36-na chu Churachandpur (Manipur)-a Saikawt Playground-ah hman niin Mizoram Legislative Assembly Speaker Lalbiakzama chuan khuallian niin a hmanpui a ni.

Hmar Martarte Ni-ah hian Assembly Speaker Lalbiakzama chuan ram leh hnam humhalhna atan an nunna hlantu Martarte chawimawi chibai bukin Martarte inhlanna chu thuin sawi kim theih a ni lova, an thisen leh an inhlanna hian hnam nunna, zahawmna leh inpum-khatna lungphum a siam tih a sawi a. Martarte chu hriatrengna mai an ni lova, hnam ro hlu an nih thu leh an inhlanna hian thangtharte thinlungah huaisenna, inpumkhatna leh ram hmangaihna a tuh zel tih a sawi bawk. Assembly Speaker chuan Hmar hnam leh Mizo identity inzawmna pawi-mawhna sawiin, Hmar hruaitute leh Organization ten Mizo/Zo inpumkhatna an ngai pawimawh chu lawmawm a tih thu leh Manipur-a Hmar Organization ten Mizo/Zo identity reaffirmation an tih chu Zo hnahthlakte inpumkhatna leh hnam nunphung humhalhna kawngah pawimawh tak a ni tih a sawi bawk.

Mizoram sawrkar leh HPC-D inkara remna thuthlung tluantling siam a ni chu lawmawm a tih thu Speaker chuan sawiin, April ni 30, 2026-a HPC-D ten ralthuam an tung chu Mizoram a remna leh muanna dinnghehna tur atan hmasawnna pawimawh tak a ni, a ti a. Manipur-a chi leh chi buaina chungchangah Zofa/Mizo zawng zawngte chu inpumkhatna leh inunauna vawngnung zel tura ngenin, tawng hrang leh identity hrang nei mah se Mizo/Zo identity chuan min khung-khawm vek tih hre reng tur leh mahni culture leh identity vawng chungin inpumkhat zel turin a chah a ni.

Hmar Martarte Ni-ah hian Martarte hriat-rengna atan tawngtaina hun hman a ni bawk.