Zirlai 1,29,285 te hnenah Mid-Day Meal pe mek

Kum 2025-26 atan Mizoram-a sawrkar Primary School leh Middle School zirlai 1,29,285 hnenah chawchhun, Mid-Day Meal (PM-POSHAN) sem a ni a; sawrkar kum kal mekah April - June thla chhung atan ei siamtu (cook-cum-helper)-te hlawh tur pek tawh niin School te hnenah April-May thla chhunga ei siamna hmanrua (material component) man pek a ni tawh bawk.

School Education Department hnuaia PM-POSHAN hotute hnen atanga Akashvani News Aizawl thudawn danin, sawrkar kum kal mekah hian Mizoram sawrkar hnuaia School 2,507-a zirlai 1,29,285 hnenah chawchhun sem a ni a, heng te hi Pre-Primary School zirlai 22,960, Primary School zirlai 70,017 leh Middle School zirlai 36,308 an ni a. Central-in a ruahman ang chuan chawchhun-ah hian Primary School zirlai naupang pakhat tan ni khatah Rs. 6.11 leh Middle School zirlai naupang pakhat tan Rs. 8.35 zel dah a ni a, an chawhmeh turte hi Dietitian-te'n an ruahman thin a ni.

Sawrkar laipui chuan ei siamtute hlawh tur First Intalment a rawn pek tawh thu PM-POSHAN hotute chuan an sawi a, First Instalment hian April atanga June thla hlawh pek an ni a. Sawrkar laipui hian Mizoram sawrkar hnenah Second Instalment tur a rawn pe tawh a, tunah hian State sawrkar kutah la awmin, State sawrkarin a pekchhuah veleh ei siamtute hlawh hi pek chhunzawm theih a nih dawn thu an sawi.

Buhfai leina, phurhna leh a kaihhnawih thildang (management, monitoring & evaluation) chu central-in zaa za (100%) a rawn tum a, chawhmeh man leh Cook-cum-Helper hlawhte chu Central leh State sawrkarin an intum sem thung tih an sawi bawk.