Thla hnih chhungin khualzin 1,27,458 an awm

Tourism Department chuan Mizoram-a Tourist Service Provider-te hnen atanga khualzin awm zat an chhinchhiah danin kumin August leh September thla chhung khan Mizoram-ah khualzin (tourist) mi 1,27,458 an awm.

Tourism Department hotute hnen atanga Akashvani News Aizawl thudawn danin, kumin August leh September thla chhunga Mizoram-a khualzin rawn lutte hi ramdang mi, foreigner 2,208 leh India khua leh tui mi 1,25,250 an ni a; Aizawl District-in khualzin dawng tam berin mi 75,461 a dawng a ni. Khualzinte hi Hotel leh a kaihhnawih khualzinte thlenna hmun te, Tourist-te hmun tlawh thin te leh Mizoram luh leh chhuahna hmun atangin chhinchhiah an ni a; kumin September ni 13 atanga Sairang a Rel a lo luh hnuah Tourism Department chuan Sairang Rel Station chu Entry Point atan hmangin Domestic Tourist rawn lut 2610 a chhinchhiah tawh  a ni.

Aizawl district chu August thla leh September thla chhunga  khualzinte luh tam berna a ni a, Kolasib District-in dawtin, Mamit, Saitual, Serchhip, Lawngtlai, Champhai leh Lunglei District-te pawh khualzin sang khat chuang awmna an ni bawk a. Lawngtlai District chuan ramdang mi khualzin a nei tam hle a, Tourism Department chhinchhiah danin August thla khan foreign tourist 1250 awmin, September thla khan mi 407 an awm bawk a. Heng te hi Myanmar, Rakhine State atanga lut te anni tlangpui tih an tarlang bawk.

Tourism department-in heng hmun hrang hrang atanga khualzin rawn lut zat a lakkhawm tawh chin hi September thla thleng niin, thla hmasa October thlaa tourist rawn lut zat data hi lakkhawm mek a ni a. September thla-a Entry leh Exit point hrang hrang awmte chu - Mamit District-ah Lengpui Airport (ILP) leh Security-ah FRO (Foreign Tourist) leh Kanhmun. Kolasib lam Entry leh Exit-ah Bairabi leh Vairengte te a awm bakah Sairang Rail Station-ah Entry leh Exit Point a awm bawk a. Ramdang atanga khualzin tam tak te hi Myanmar, Israel, Japan leh USA mite an ni