Mizoram tana Youth Affairs a hmalakna tur sawipui

Sports & Youth Services Department changtu Minister Lalnghinglova Hmar chuan nimin khan sawrkar laipui-a Secretary (Youth Affairs) Pallavi Jain Govil-i chu hmuin sawrkar laipui-a Youth Affairs hnuaia Mizoram-a hmalakna tur a sawipui.

Shashtri Bhawan, New Delhi-a an inkawmna ah hian Sports Minister Lalnghinglova Hmar chuan Ministry of Youth Affairs & Sports kalpui Mera Yuva Bharat, tunhma lamah NYK Sangathan ni thin hnuaia Mizoram-a indaihlohna nasa tak a awm thu Secretary chu a hrilh a. Mizoram a District 11 zinga pariat-ah MYB in District Office a nei a, tun dinhmunah District Youth Officer (DYO) pali chauh an awm thu leh Accountant leh Multi-Tasking Staff (MTS) phei chu pakhat ve ve chauh an awm tih a sawi a ni.

Union Youth Affairs Secretary Pallavi Jain Govil-i chuan UPSC kaltlangin DYO 190 an la mek tih Minister hi lo hrilhin, DYO awm lohna District 420 ah an semrual tur thu leh Mizoram pawh an pek tur thu Minister hi a lo hrilh a. Accountant leh MTS te pawh Agency kaltlanga an lak tur thu leh tun atanga reilote ah Mizoram-ah pawh an post tur thu a sawi a ni.

Sports Minister Lalnghinglova Hmar chuan Aizawl Luangmual-a Youth Hostel chu a ram neitu nih inchuhna a awm mek thu pawh sawiin, hetih laiin Mizoram-ah Sairang thleng Rel a luh tawh avanga khualzin an pun bawk avangin Youth Hostel thar mamawhna a sang tih a sawi a, ram tur chu sawrkarin a neih theih tur thu a sawi bawk a. Youth Affairs Secretary chuan Mizoram sawrkarin lehkha pawimawhte a thehluh hunah hma an lak thuai tur thu leh Mizoram case chu ngaih pawi-mawha an neih tur thu Minister hnenah hian a lo sawi bawk a ni. He hunah hian sawrkar laipui Youth Affairs hnuaia hmalakna hrang hrangte an sawi bawk a ni.