JSJB 2.0 kalpui dan tur rel

Nimin khan Lunglei-ah Vantlang thawhhona kaltlanga tui khawl leh humhalh tura hmalakna, ‘Jal Sanchay Jan Bhagidari’ (JSJB) 2.0 kalpui dan tur sawihona neih a ni.

He sawihona District Bawrhsap Pisa-a neih ah hian Bawrhsap Navneet Mann-i chuan JSJB 2.0 chu Ministry of Jal Shakti hnuaia ‘Jal Shakti Abhiyan: Catch the Rain’ Campaign hmalakna peng khat a nih thu sawiin, tuihna humhalh, tui renchem leh ruahtui khawlkhawm te chu sawrkar kut chauh ni lovin, khua leh tui zawng zawng hmalakna tur leh thawhhona tur a nih thu a sawi a. Lunglei District-a mi tinin tui in tur leh hman tur hnianghnar an hmuh theih nan leh JSA: CTR leh JSJB 2.0 hmalaknate a hlawhtlin theih nan sawrkar department, khawtlang hruaitu, tlawmngai pawl leh mipui vantlang te chu mahni zawnah tan la theuh turin a chah bawk.

JSJB 2.0 hi tuizem leh tuikhuah siam leh enkawl kaltlanga tui awmsa humhalh leh renchemna tur leh leihnuai-a tuihna tipung tura hmalakna tur a ni a. Mipui tui mamawhna phuhru tur leh tuihna tipung tura sawrkar, sumdawng, tlawmngai pawl, khawtlang thuneitu leh mipuite thawhhonaa hmalak chu he campaign hian a tum a ni.

JSJB 2.0 hnuaiah hian ruahtui khawlna tur tuizem siam te, tui luang riral tur venna khur (soak pit) leh tuikhuah (check dam) siam te, leihnuai a tuihna khawl leh tipung tura hmalakna hrang hrang te kalpui a ni dawn a. Heti lam hawia hmalakna hrang hrangte chu June 2025 leh May 2026 inkar chhungin JSJB portal-ah thehluh tur niin, Category hrang hranga hma la tha State leh District te tan lawmman siam a ni ang.

Lunglei District-a JSJB 2.0 kalpui turah hian Department hrang hrang hnuaia tuizem, tuikhuah, khur leh tui khawlna siam tawh leh helam hawia hmalaknate khawnkhawmin, Lunglei District dinhmun zirchian hmasak nise, chumi atang chuan hma lak zui dan tur ruahman leh nise an ti a ni.