Chhim Veng Kohhran Biak In Moderator in a hawng

Mizoram Presbyterian Kohhran Serchhip Chhim Veng Kohhran Biak In sak thar chu Inrinni, Nov. 15, 2025 khan Mizoram Synod Moderator Rev. RC. Lalnghakliana chuan a hawng.
Serchhip Chhim Veng Kohhran Biak In thar hawnna hi chawhnu dar 2:00-ah neih niin Synod Moderator hian a hawn hnuah Biak In thar lawmna Inkhawm neih zui a ni a, Report ngaihthlak a nih bakah Moderator hian Pathian thuchah a sawi a, Kohhran mi thahnem tak an inkhawm a, nizan thleng khan Biak In thar lawmna hi neih zui a ni.

Presbyterian Serchhip Chhim Veng Kohhran Biak In thar sa tur hian Feb. 4, 2023 khan lungphum phumin Feb. 20, 2023-ah sak tan a ni a, hlawhfa tha 3725 leh Kohhran mipui tha 1697 sengin Rs. 120,46,732/- sen a ni a, a dung ft. 90 leh a vang ft. 44-a zau niin mi 652 lenna tura ruahman a ni a, nikum December 20 khan an lo luahlut tawh a ni.