Mizoram in phochhuah tlak hmun mawi leh nuam a nei tih sawi

Mizoram sawrkar-a Tourism Department changtu Minister Lalnghinglova Hmar chuan tunhnai ah Mizoram tlawhtu an pung nasa tih sawiin, Mizoram in phochhuah tlak hmun mawi leh nuam tak tak kan neih thu a sawi.

New Delhi-a cham mek Tourism Minister Lalnghinglova Hmar hian nimin khan NITI Aayog Member Dr. VK Paul chu New Delhi-a NITI Aayog Headquarters-ah kawmin Mizoram tourism hmasawnna tur chung-chang ngaihtuahin hmalakho dan tur an sawidun a, he hunah hian Tourism Minister chuan tunhnaiah Mizoram tlawhtu an pung nasa tih sawiin, Sairang thleng Rel a luh hnuah phei chuan Aizawl-a Hotel leh Homestay te pawh khualzinin an luah khat thin hle tih a sawi a. “Mizoram-in phochhuah tlak hmun mawi leh nuam tak tak kan nei a, heng hmunte hmanga Tourist hiplut tur chuan a khawtual mite'n kan hlut a, kan tlawh hmasak a ngai. Hemi kawngah tunhnaiah nasa takin hma kan sawn a, a lawmawm hle a ni.” a ti.

Mizoram-a Tourism hmasawnna'na NITI Aayog leh Mizoram sawrkar hmalakna tur sawiho zingah Mizoram Tourism Conclave buatsaih a tel a. Stakeholder tam zawk an tel theihna tur leh Mizoram in a hlawkpui theih tura ruahmanna siam nise tih a ni a. Hemi chungchang bika hmalatu tur 'Task Force' din a, a ranglama a hun tihchian theih nise tiin rel a ni. New Delhi-a 'Mizo Day' hman chungchang sawiho a ni bawk.

NITI Aayog leh Mizoram sawrkar tangkawp chuan Nov.24, 2025-ah Mizoram Sawhthing tharchhuah chungchanga inrawn-khawmna, 'Stakeholder Consultation on Ginger Produce for Mizoram' tih chu New Delhi-ah buatsaih an tum bawk a. He hun hi Chief Minister Lalduhoma'n a telpui dawn a, sawrkar Official bakah Industry, zirna In leh Organisation tam thei ang sawm an nih tur thu he Meeting-ah tarlan a ni. Hemi zulzuia Sector dang - a bikin Tourism-a programme siam chungchang pawh ngaihtuah ho a ni bawk.