Dampa bial-ah mipui ten tluang taka Vote thlakin tunkar Zirtawpni-ah Vote chhiar a ni ang

Dampa Bialtu MLA a boral avanga he Bial-a Assembly by-election neih tur atan nimin khan mipui ten tluang takin Vote an thlak a, he thu buatsaih lai hian Vote tlak dan kimchang hriat la ni lo mah se Vote hi a tla tha thawkhat a, tunkar Zirtawpni, November 14, 2025-ah Vote tla te hi chhiar tur a ni ang.

Dampa Bial-a Assembly by-election atan hian ruahman lawk angin nimin zing dar 7:00 khan Polling Station 41-ah Vote thlak hi kalpui a ni a, Polling Station 40-ah Webcasting hmangin District Election Office atanga vil reng an ni a, Zopui Polling Station-ah erawh kawlphetha a awm loh avangin Webcasting hi kalpui a ni lo a, zing dar 7:00 atangin Polling Station tinah Vote thlak tura intlar awm deuh rengin Vote tla hi hriat theih chinah Silsury-I leh Marpara North tel lovin zaa 75.92 a tling a, zaa 80 vel chu Vote hi tla phak tura beisei a ni.

Dampa Bial Be-election neihah hian Political Party hrang hrangte chuan hnehna an chan ngei an inbeisei thu an sawi a, Rorellai ZPM Party Vice President leh Dampa Bial By-election Campaign Chairman C. Lalnunnema chuan Dampa Bial mipui chevel bakah Party worker te phur dan leh Party hruaitute thahnem ngaihna enin ZPM Candidate Vanlalsailova chuan hnehna a chan ngei a rin thu a sawi a, Dampa Bial mipuite chuan sawrkar mek an nihna leh kalphung thar mipui sawrkar an nihna anga hma an lakna te an hmuh avangin Ruling MLA neih ve duhna thinlung an nei lian hle a a hriat thu a sawi bawk.

MNF Vice President Lalchhandama Ralte pawhin Dampa Bial By-election a candidate tha tak tak karah MNF party Candidate, an party Senior Vice President ni bawk, Dr. R.Lalthangliana chu politics lama a tawnhriat leh hun hman tawhte thlirin mipuite duh leh ngainat a hlawh dawna an hriat thu a sawi a, hei bakah hian sawrkar lai chu sawi loh ang zela an awm avangin mipuiten an chhangkham tan tawh hle a an hriat thu sawiin, tun By-election neih mekah mipuiten warning pek nan an hmang dawna a hriat thu a sawi a, tun inthlanah hian Pathian leh mipuite zarah MNF party chuan hnehna an chan ngei a rin thu a sawi bawk.

BJP Mizoram President Dr. K. Beichhua pawhin Dampa Bial By-election ah tling ngei turin theihtawp an chhuah avangin an candidate Lalhmingthanga chu a tlin ngei an beisei thu a sawi a, an lo tling a nih chuan mipuite chu hmasawnna duha an tuihal avangin BJP an vote tling nia a ngaih thu a sawi a, tu party tan pawh tun By-election ah hian tling kher lo pawhin vote share a pawimawh avangin kum 2028 Assembly inthlanpui ah an hlawkpui a rin thu a sawi a ni.

Congress Treasurer Dr. Lalmalsawma Nghaka chuan Dampa Bial By-election ah hian Congress Party chu hmasawn nasa ber an nih thu khawtual mite’n an sawi nia sawiin, chu thli chuan Congress Party Candidate, an party Vice President ni bawk John Rotluangliana pawh a tlin tir ngei an rin thu a sawi a, Dampa Bial-a an campaign-naah mipuite chuan Congress Party chu an thutiam ah an ding nghet a, an Policy an tihhlawhtlin thin avangin kum 2028 chu Congress hun a ni tawh an tih thu sawiin, kum 2028 Assembly inthlanpui lo awm turah sawrkarna siam thei ngei turin Congress Party chu an inbuatsaih mek tih a sawi.

PC Party President Vanlalruata chuan tun tum Dampa Bial By-election ah hian tlin an in ring lem lo tih sawi tungin, hetihlai hian he inthlanah an party in Candidate an din tir nachhan chu hun kal zelah an party tan a that beisei vanga ti an nih thu a sawi a ni.

Dampa Bial Inthlan ah hian thil duh-awm lo thleng hriat tur a awm lo a, Vote thlaka EVM te hi Mamit-ah phur khawmin tunkar Zirtawpni khian Vote tla te hi chhiar a ni ang.