Serchhip dai-ah rakzu tam tham tak man a ni

Nizan hmasa zanlai pelh hnu deuh khan Ser-chhip leh Keitum inkarah Rakzu tam tham tak man niin hemi kaihhnawih ah hian mi pahnih leh lirthei pahnih man a ni bawk.
Serchhip-a Excise & Narcotics Department hotute hnen atanga LENKAWL in thu a dawn danin nizan hmasa dar 1:00 vel khan Serchhip-a Excise & Narcotics Department hian Serchhip leh Keitum inkarah rakzu litre 560 leh a neitu nia hriat Lallianhuma (22), Phunchawng Melruk nia insawi te chu manin Zu phurhna atana hman lirthei (Tata Yodha) pawh man nghal a ni a. Hei bakah hian lirthei dang (Wagon-R) atangin rakzu litre 300 chu man leh niin a neitu nia hriat Lalzuiliana (33), Phunchawng Melsarih nia insawi pawh an man leh bawk a ni.

Heng Zu man kaihhnawih ah hian MLP Act 2019 hnuaiah thubuai ziahluh niin heng Zu leh a neitu nia hriat te bakah a phurhna atana hman lirthei te hi nimin vek khan Serchhip District Court-ah hruai nghal an ni. Heng Zu te hi Serchhip leh a chhehvel a pek tur nia hriat a ni.