Thlai panga an lei thu Chief Minister in a sawi

Chief Minister Lalduhoma chuan an sawrkar flagship Programme - Bana kaih hmangin thil panga- Hmuhphiah, Aieng, Mizo Hmarcha, Buhhum leh Sawhthing lei a nih thu a sawi.

India ram zalenna ni vawi 79-na lawmna nimin-a Aizawl Lammual-a neiha Hnam Puanzar a pawhparh hnu-a thuchah a sawi ah Chief Minister chuan Mizo Hmarcha lei leh hralhah harsa a awm lova, Aieng hi quintals 400-ah Support Price pek niin Buhhum hi quintal 1,472 lei a nih thu a sawi a. Hmunphiah pawh quintal 40,327 leiin kuthnathawktute'n Grade A leh B-a then an tih hleitheih loh avangin nakum atang chuan Grading lovin a pulung-a lei sak an ni ang, a ti. Chief Minister chuan Sawhthing quintal 3,48,066 lei a nih thu pawh sawiin, Sawhthing ringawtah Support Price atan cheng vbc. 142 chuang sawrkar in a seng ang a nih thu a sawi a. Sawhthing sawngbawlna pawh hmun 4-ah din tum mek a ni tih a sawi a. ‘Rapchung Technology’ hnuaiah Lalzuimawia’n thing hmanga Sawhthing urrona khawl siamin, a tha hle dawn a an hriat thu leh Sawhthingin leilung a tihchhiat dan zirtu Team din a nih thu bakah Lo nghet nei zawnga kalpui tura ruahman mek a nih thu a sawi bawk.

Chief Minister Lalduhoma chuan damdawi hmanga siam leitha tel lova huan thlai siam 'Organic Farming' uar telh telh tum a nih thu a sawi a, CM Rubber Mission hnuaiah thawh khatna atan Rubber chinna hmun thar hectare 1,000 leh Phase 2 atan hectare 2000-a zau ruahman a ni tih a sawi a. Zau (cluster) hrang hrang tan a hnaina khawl 100 pek an nih tur thu leh Thelret chinna hmuna Khuai khawi kalpui tel tura ruahman a nih thu a sawi bawk.

Chief Minister chuan pawisa puk hmanga sawrkar thawhpui tur (Progress Partner) 646 thlan an nih tawh thu leh mi 125 hnenah loan pek an nih tawh thu pawh a sawi a. Hei bakah hian CM Special Package hnuaiah Progress Partner mi 2,257 thlan an nih thu pawh sawiin, hemi atan bik hian cheng vbc. 18.35 dah a nih thu a sawi bawk.

Chief Minister Lalduhoma chuan hmachhawp tam tak la tih loh te an nei tih pawh sawiin, “Kan tih duh loh vang emaw, kan tih theih loh vang emaw a ni lova. Miten kum 15 chhungte, kum 20 chhungte a an tih theih loh kha keini’n kum 1 leh thla 8 chhung lek hian kan ti hman bik ngang lo a ni zawk e,” a ti a. “ Khawvel Footballer tha ber te zinga mi Cristiano Ronaldo leh Lionel Messi te meuh pawh hian vawi 33 leh vawi 31 ve ve lai Penalty an pet goal thei bik lova. Keini, experience la nei lo te phei hi chu tlin lohna kan ngahin kan insit em em a ni. Theihtawp tak meuh kan chhuah tih erawh min lo hriatpui dawn nia. Mipuiten min tawiawmna ah te, min tawngtai saknaah te lawmthu ka sawi a. Kan kutke ber sawrkar hnathawkte chungah pawh a bik takin lawmthu ka sawi e,” a ti bawk.