LADC-a CEM banna pawm; CEM thar ruat nghal a ni

Mizoram Larsap Gen. Vijay Kumar Singh chuan Lai Autonomous District Council (LADC) Chief Executive Member (CEM) atanga V. Zirsanga banna chu pawmin N. Zangura chu CEM thar atan hian ruat nghal a ni.

Tarlan tawh angin LA-DC-a CEM V. Zirsanga hian LADC MDC te zingah thlawptu a ngah leh ngah loh niminpiah khan fiah tur a ni a, thutkhawm neih a nih hma lawkin Larsap hnenah CEM atanga a banna chu LADC Chairman T. Zakunga kaltlangin a thehlut a. Chairman hian a banna lehkha hi Council Inkhawmah hian chhiarchhuakin fiahna hun hman a ni ta lova. A banna hi Larsap chuan a pawm nghal a ni.

Larsap hian BJP hruaitu leh United Democratic Alliance (UDA) Legislature Party-in hruaitu atana an thlan N. Zangura chu LADC-a CEM atan ruat nghal tih District Council & Minority Affairs Department chuan nimin khan hriattirna an chhuah nghal a. Karleh Thawhlehni, August ni 19 khian LADC inkhawm koh niin hemi ni hian N. Zangura hian MDC thlawptu a ngah leh ngah loh finfiah a ni dawn a ni.

Tun dinhmunah LADC ah mipui thlan MDC 25 awmin MNF-a MDC 11, BJP MDC 2 leh pawnlam atanga thlawptu Congress MDC pakhat nen UDA chuan Member 14 an nei mek a, ZPM in Member 11 an nei bawk a ni.