Lunglei DRA thutkhawm nei

Niminpiah khan Lunglei District-a hriselna dinhmun enfiahna leh inentirna (clinical establishment)-te dan anga chhinchhiah leh khuahkhirh tura din, District Registering Authority (DRA) chu Lunglei District Addl. Deputy Commissioner Zoramdini hovin a Pisa-ah an thukhawm.

Sawrkar laipui dan siam, The Clinical Establishments (Registration and Regulation) Act, 2010 behchhanin Mizoram-a Clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoram-ah hman a ni a. He dan hnuaiah hian damdawi In, Clinic leh Laboratory te chu DRA-ah an inziahluh (register) vek a, a him chin leh pawm theih chin (minimum standard) an phak ngei ngei a ?ul a. Chuti ang tur chuan Lunglei District-ah pawh hma lak chhoh mek a ni.

Lunglei District Sr. CMO Office-in an chhinchhiah danin, tun dinhmunah Lunglei District chhungah sawrkar hriatpui Clinical Establishment 51 a awm mek a. Heng zinga 15 chu sawrkar enkawl (District Hospital, Community Health Centre leh Primary Health Centre) niin, a dang 36 chu mimal din (private) damdawi In, Clinic leh Laboratory a ni thung.

He Meeting hian Lunglei District a damdawi In leh Clinic zinga Provisional registration tihnun zawm (renew) ngaite chu hriat nawn tirna (reminder) thawn nise tiin, Laboratory-te chu Permanent Registration tih ngai an nih avangin kumin October ni 12 ralhmaa ti fel turin hriattirna chhuah nise an ti a. CEA dan hnuaia la lang lo, Clinical Establishment hnuaia rinluh tul turte chu Department lamin lo zirchiang se, Clinic leh Laboratory te enfiah hun tur ruahman nise an ti a. Damdawi In thli leh bawlhhlawh (bio-medical waste) sawngbawl leh thehthang chungchangah hmunhma tha zawk siam a nih theih nan hmalak dan ngaihtuah nise an ti bawk.