Bawngkawn-a inthlahna thleng ah mi pahnih man

Aizawl Bawngkawn Veng-a cheng Vanlalhnuna (51) chu nizan hmasa khan thiin, he thihna a inhnamhnawih nia hriat mi pahnih te chu man nghal an ni.

    Thudawn danin kum 51-a upa Vanlalhnuna s/o Thangluaia (L) hi nizan hmasa dar 6:30 vel khan a chenna In-ah hliam na tak tuara hmuh niin hemi hnu zan dar 7:00 vel khan a thi zui a, he thihna ah hian midang an inhnamhnawih thei nia a lan avangin Bawngkawn Police Station-ah thubuai thehluh nghal niin Police te hian thil thlenna hmun hi an pan nghal a, helai hmun-a lo awm Felix Lalthansanga (25), Vaivakawn leh Cindy Zoramchhani (21), Lengpui Vengthar nia insawi te chu thu zawhfiah tura lak nghal niin Felix Lalthansanga chuan Vanlalhnuna chu kut a thlak ngei niin Police hma-ah a sawi a. Niminpiah tlai lamah khan Vanlalhnuna In-ah Cindy Zoramchhani leh he In-a lo awm sa mipa dang pakhat te nen zu an in ho a. A chhuahsan lawk hnua a let leh chuan a thiannu leh In neitu lo awm danin a thin tirim thutin kut a thlak ta niin a sawi a, Vanlalhnuna hian a khabe, a mit veilam leh a chal-ah hliam a tuar a ni.