ZPM in Restricted Tender an kalpui nasa tih sawi

Mizoram Pradesh Congress Committee (MPCC) Spokesperson Dr. Lallianchhunga’n ZPM in Restricted Tender an duh loh zia sawi thin mahse a aia uar zawkin an kalpui mek niin a sawi.

Nimin-a Aizawl Press Club-a thuthar thehdarhtute an kawmna ah MPCC Sopkesperson Dr. Lallianchhunga chuan ZPM Leader Lalduhoma chuan MNF sawrkar laia Restricted Tender inpek dan a sawisel thu leh MNF sawrkar hnuaia sum leh pai harsatna nen a sawi zawm thu sawiin, Restricted Tender ringawt pawh an tih ve loh chuan Mizoram sum dinhmun nasa takin a siam ttha nghal ringawt dawn tia a sawi thu a sawi a. Hetiang khawpa an sawisel hi tuna an sawrkar hnuah uar leh nasa zawka an kalpui thu a sawi a ni.

Dr. Lallianchhunga chuan Sawrkar document an hmuh theih atanga a lan danin April 17, 2025 khan SASCI 2024-25 hnuaia hna cheng vbc. 629.17 man chu Restricted Tender hmanga an duhsak zawng te an thawh tir theihna turin Department te chu Blanket Approval a pe tih a sawi a. Hei hi Eptu party an nih laia an thusawi nen a inkalh chiang hle tih sawiin, RTI chhanna atanga a lan danin ZPM sawrkar pian atanga kumin April ni 29 thleng khan Restricted Tender hmangin hna lian tak tak 47, cheng vbc. 316.38 chuang man a pe chhuak tawh tih a sawi. 

Kum 2023 MLA Inthlanpui-a ZPM Manifesto ah “Contract hnate a tam thei ang ber Open Tender-a koh thin a ni ang’ tih a awm thu pawh sawiin Dr. Lallianchhunga chuan, an Party Manifesto ngei pawh palzuta sawrkarin Restricted Tender a kalpui dan chuan sawrkar belhchiandawl leh rintlak tak a níh loh zia a tilang chiang hle niin a sawi bawk.