PWD Minister in Sihhmui-a Tlawng Lei dawh a tlawh

Sihhmui-a Tlawng Lei (bridge) remkhawm tawh, dawh kai tur enchhinna, 'Trial Launch' neih tan chu Inrinni khan PWD changtu Minister Vanlalhlana chuan a hmunah a enpui.

Tlawng Lei hi 'Network Inclined Arch Bridge' a ni a, Poddar Infratech Pvt. Ltd., Delhi ten hna hi March 27, 2021 atang khan an thawk tan a, Project kalpuina atan hian MoRTH atangin cheng vbc. 36.99 ruahman a ni. Lei thar hlan fel a nih hunah kawng hi Lei hlui lam motor zawh theih a hawn theih beisei a nih thu thawktute chuan an sawi a ni.

PWD Chief Engineer Zoramliana tarlan danin Tlawng bridge thar tur hi ton 450 vel a rit niin metre 90 a thui a ni a, 70R loading Class niin Lei hi hrui hmang a khai phei a ni dawn a, minute khat ah centimetre 30 zelin pawh phei a ni ang a, darkar 6 atanga darkar 8 chhunga pawhkai hman beisei a nih thu a sawi.

He hunah hian PWD Minister Vanlal-hlana chuan Mizoram kawng pawimawh tak thlunzawmna tur Tlawng lei remkhawm mek chu hlawhtling taka dawhfel a nih thuai theih nan Inrinni khan uluk takin tihchhinna 'Trial launch' neih tan a nih thu a sawi a. Khawvel thiamna chang-kang tak hmanga lei remkhawm leh a dawh hna hi kalpui a nih avangin hun engemaw chen kawng khar a ngai chu pawi a tih thu sawiin, inkalpawhna tha leh rintlak zawk kan neih theih nan he kawng zawhtu mipuite chu hun reilote chhung lo la dawh hram hram turin a ngen a. Ruahman ang a hna kalpui a nih chuan tunkar chhung hian Lei hi dawh kai hman beisei a nih thu a sawi a, Lei dawh kai atanga ni 120 chhungin lirthei engchi pawhin a zawh theih tura hawn hman tum a nih thu a sawi a. ZPM sawrkarna hnuaiah chuan State Monitoring Committee ten hnathawh hrang hrangte an thawh lai leh an thawh zawh hnu thleng pawhin a theih chin chinah an vil reng dawn tih a sawi bawk.