C. Laldinpuia Memorial Volleyball Tournament khel tan
SDVA Secretary boralta C. Laldinpuia hriatrengna atana buatsaih he Tournament hi Mizoram Volleyball Association (MVA) Sr. Vice President Lalmawi-zuala chuan khuallian nia hawngin Volleyball tana C. Laldinpuia hna lo thawh tawh hrang hrangte chu an hriatpui thu leh a boralta chu channa nasa takin niin, “Mi uihawm tak kan chan a ni,” a ti a, tunah chauh ni lovin nakin zelah an la ui deuh deuh dawn niin a sawi. Mizoram-a District hrang hrang zingah Serchhip District chu Volleyball-a District nung ber te zinga mi a ni tih sawiin, Academy tha te kan la neih loh avangin SDVA in Age Group Tournament an buatsaih thin te pawh lo buat-saih chhunzawm zel turin a chah bawk a ni.
He Tournament hawnna hun hi SDVA President K. Tlangthanmawia chuan kaihruaiin SDVA Adviser C. Biakchhawna pawhin C. Lal-dinpuia chanchin a sawi bakah ruihhlo laka fihlim a pawimawh zia a sawi bawk a. SDVA General Secretary Zothansanga chuan Technical Report a pe bawk.
Tunkar Inrinni thleng awh tura ruahman C. Laldinpuia Memorial Volleyball Tournament-ah hian Affiliated Club (Mipa) atangin Team 9 an tel a, hei bakah hian kum 40 chunglam inelna turin Veteran Category siam ni bawkin Team 7 an tel thung a, Category pahnih-a tel te hi Pool pahnih-ah ve ve thenin Pool pakhat-a awm zel te hi an inhmachhawn kual dawn a, a tawp-ah point hmu sang pahnih ve ve ten Semi Final an khel dawn a ni.
Nimin-a he Tournament hawnna hunah hian Serchhip District Wrestling Association te pawhin an hruaitu ni bawk, C. Laldinpuia an ui thu hi sawiin, Tournament huaihawttu SDVA te hnenah sumfai-a tanpuina an hlan bawk a ni.
Comments
Post a Comment