DGP hovin ‘Police Commemoration Day’ hman a ni

India ram Police duty laia thite hriatrengna ni, Police Commemoration Day chu nimin khan Mizoram hmun hrang hrangah hman a ni a, Aizawl-a 1st BN MAP Martar thlan-a hun hman chu DGP Mizoram chuan a hmanpui a ni.

Nimin zing-a he hun hmanna ah hian DGP Anil Shukla chuan nikum September ni 1 leh kumin August ni 31 inkar khan India ramah Police mi 216 zetin an mawhphurhna an hlenna kawngah nunna an hlan tih sawiin, August ni 15, 1947 atanga kumin August ni 31 thleng khan Police 36,447 zet Martar an awm tawh tih a sawi a. DGP chuan Pathian khawngaihna leh venhimna azarah Mizoram Police hian he hun chhung hian an duty-na hmuna martar-a thi an awm loh thu a sawi bawk a ni. He hunah hian Police boralte sun nan silai vawi thum kah puah a ni a, tun tumah hian Mizoram Police awm lo mah se tunhma lama boral tawhte lungphunah anmahni hriatreng nan pangpar dah a ni bawk.

Nimin vek khan 3rd IR Battalion, Thingkah-ah pawh 'Police Commemoration Day' hi 3rd IR Battalion Commandant F. Lalbiakzauva MPS hovin hman a ni a, September ni 1, 2023 atanga August ni 31, 2024 inkarah duty laia boral Police mi 216 set awmin Mizoram-ah erawh duty laia boral an awm lo mah se, natna leh chhan hrang hrang avanga kumtin nunna chan an awm fo thin chu pawi a tih thu a sawi a. Mahni hriselna ngaipawimawh tur leh fimkhur zawka nun hmang turin 3rd IR Battalion-a Police awm mek te a chah nghal a ni.

Lunglei-ah chuan Deputy Inspector General of Police (Southern Range)  C. Lalthanmawia hovin nimin zing khan 2nd Bn MAP hmunah 'Police Commemoration Day' hi hman a ni a, he huna tarlan a nih danin  kum 2023 September leh 2024 August (kum khat) chhung hian India ram pumah an duty laia nunna chan Police mi 214 an awm a. Chu'ng zingah chuan a Force malah CRPF mi nunna chan tam berin mi 23 nunna chan an awm a. Madhya Pradesh chu nunna chan tamna ber State niin mi 23-in nunna an chan a. Vanneihthlak takin Mizoram-ah erawh duty laia nunna chan an awm lo a ni. Mamit-ah pawh SP Pukhraj Kamal hovin nimin khan 'Police Commemoration Day' hi hman hi hman a ni a, SP chuan India ram a police inpekna chu ropui a tih thu a sawi a, taksa hrisel tak neih a pawimawh vangin nun dan (lifestyle) tha zawm turin Police te chu a chah a ni

Kum 1960-a Annual Conference of Inspectors General of Police of States and Union Territories neih chuan, October ni 21 chu Police Commemoration Day atan pawm turin an ti a, hemi kum atang hian kumtin October ni 21 hi Police Commemoration Day atan hman thin niin, India ram humhalhna kawnga inpekna sang ber, mahni nun hlantu Police martar huaisente chawimawina ni atan hman thin a ni.